Ո՞րն է հայկական հեղափոխությունը

10 09 2011

 Հերթական անգամ ընդդիմությունը Ազատության հրապարակում հավաքվածներին տուն ուղարկեց։

Սակայն այս անգամ խոստացավ, որ այսուհետ ամեն ժամ հասունացնելու է «Հիմա»-ն։ Հայ ազգային կոնգրեսի առաջնորդ Լեւոն Պետրոսյանն էլ իր ելույթում ընդգծեց. «Սկսել ա»։

Ազատության հրապարակում ելույթ ունեցողները շեշտեցին՝ հեղափոխությունը հասունացել է։

Այն, որ հեղափոխությունը հասունացել է, գոնե Ազատության հրապարակ այսօր եկածների համար փաստ էր։ Նրանք վճռական գործողություններ ակնկալում էին ՀԱԿ լիդերներից ոչ միայն այսօր, այլեւ մեկ, նույնիսկ երկու տարի առաջ։

Նստացույց անելու պատրաստ զանգվածը հրապարակից հեռացավ հիասթափված։ Բայց սա չի նշանակում, որ չի գա հաջորդ՝ սեպտեմբերի 23-ի հանրահավաքին։ Պարզապես՝ ՀԱԿ-ից կտրուկ ու վճռական գործողության ակնկալիքը կրկին նվազեց։

Լեւոն Տեր-Պետրոսյանն այսօր հայտարարեց, թե. «Մեր նպատակը մնում է նույնը, այն է՝ անդադար զանգվածային միջոցառումների ճնշման տակ իշխանափոխության շուտափույթ իրականացումը եւ ավազակապետության ամբողջական կազմաքանդումը։

Մենք առաջնորդվում ենք ոչ թե կենաց-մահու պայքարի խելահեղ գաղափարով կամ «մահ կամ ազատություն» անպատասխանատու կարգախոսով, այլ ժողովրդի ու պետության առջեւ մեր պարտքը մինչեւ վերջ կատարելու եւ մեր նպատակին հասնելու բոլոր օրինական հնարավորություններն օգտագործելու սառը գիտակցությամբ»։

ՀԱԿ-ը խոստանում է հեղափոխություն։

Իշխանական կոալիցիայի ներկայացուցիչները դեռ չեն արձագանքել։

Բայց հաշվի առնելով ՀԱԿ-ի արտահերթ ընտրություններ անելու մտադրության վերաբեյալ իշխանության արձագանքը՝ կարելի է ակնկալել նույն պատասխանը. «Չի լինելու»։

ՀԱԿ-ում վստահ են, որ արտահերթ ընտրություններ հայտարարվելու են, եւ ոչ միայն…

Իսկ ի՞նչ եք մտածում Դուք։ Եվ ընդհանրապես՝ ո՞րն է հայկական հեղափոխության Ձեր տարբերակը եւ կա՞ արդյոք դրա անհրաժեշտությունը։





Ինչո՞վ կավարտվի ՀԱԿ-ի իշխանություն երկխոսությունը

25 07 2011

Վաղը Կառավարության ընդունելությունների տանը կկայանա  ՀԱԿ-իշխանություն երկխոսության երկրորդ հանդիպումը: Իշխանությունների պատվիրակության ղեկավարը Դավիթ Հարությունյանն է, իսկ ՀԱԿ-ինը՝ Լեւոն Զուրաբյանը:

Փաստն այն է, որ իշխանությունները սկզբում մերժեցին պատվիրակություն ստեղծելու առաջարկը, իսկ  նախապատրաստական հանդիպումից հետո, որը տեղի ունեցավ օգոստոսի 18-ին,  արդեն պատրաստ են նստել կլոր սեղանի շուրջ եւ երկխոսել:

Ըստ ՀԱԿ-ի՝ երկխոսության հիմնական թեման ՀՀ նախագահի եւ խորհրդարանի արտահերթ ընտրություններն են, իսկ իշխանությունները պատրաստ են  քննարկել ցանկացած հարց՝, բացի  արտահերթ ընտրություններից: ՀԱԿ-իշխանության երկխոսության վերաբերյալ քաղաքական ուժերի տեսակետները տարբեր են: Այս հարցում տարաձայնություններ կան նույնիսկ ՀԱԿ-ում:

Որոշ լուրերի համաձայն՝ ՀԱԿ-ի  անդամներից մի քանիսը Լեւոն Տեր-Պետրոսյանի առաջ խնդիր են դրել, եթե մինչեւ սեպտեմբերի 1-ն իշխանությունները չհայտարարեն արտահերթ ընտրություններ, ապա ՀԱԿ-ը հստակ պետք է արձանագրի ջրբաժանը: Ակնհայտ է, որ ՀԱԿ-ի իշխանություն առաջին հանդիպումից հետո իշխանություններն այլեւս կտրուկ չեն բացառում արտահերթ ընտրությունների հնարավորությունները:

Իսկ ի՞նչ եք կարծում դուք՝ իշխանությունները կգնա՞ն արտահերթ ընտրությունների, թե՞  ոչ, ի՞նչ հարցեր կուզեիք տեսնել երկխոսության օրակարգում եւ  ընդհանրապես ինչո՞վ  կավարտվի երկխոսությունը





Ինչի՞ն է համաձայնվել Սերժ Սարգսյանը Կազանում

24 06 2011

Ինչի՞ն է համաձայնվել Սերժ Սարգսյանը Կազանում

Կազանում ավարտվել է Հայաստանի, Ռուսաստանի և Ադրբեջանի նախագահների եռակողմ հանդիպումը՝ նվիրված ԼՂ հակամարտության խաղաղ կարգավորմանը:

ՌԴ նախագահ Դմիտրի Մեդվեդևի նախաձեռնությամբ կայացած եռակողմ հանդիպման արդյունքում նախագահներ Սերժ Սարգսյանի, Դմիտրի Մեդվեդևի և Իլհամ Ալիևի անունից տարածվել է համատեղ հայտարարություն:

«Պետությունների ղեկավարները արձանագրեցին մի շարք հարցերի շուրջ փոխըմբռնման ձեռքբերումը, որոնց լուծումը կնպաստի Հիմնական սկզբունքներին հավանություն տալու համար պայմանների ստեղծմանը»,- նշվում է հայտարարության մեջ:

 

Հայաստանի և Ադրբեջանի նախագահներ նաեւ երախտագիտություն են հայտնել «ԵԱՀԿ Մինսկի խմբի համանախագահող երկրների՝ Ռուսաստանի, ԱՄՆ-ի և Ֆրանսիայի առաջնորդներին՝ Լեռնային Ղարաբաղի հիմնախնդրի կարգավորման ուղղությամբ նրանց մշտական ուշադրության համար և բարձր գնահատեցին պայմանավորվածությունների ձեռքբերմանն օժանդակելու ուղղությամբ Ռուսաստանի Դաշնության նախագահի անձնական ջանքերը»:

 

Այլ մանրամասներ պաշտոնական աղբյուրները չեն հաղորդում:

Մինչդեռ այսօր առավոտյան ռուսական լրատվամաիջոցները, մասնավորապես «Կոմերսանտը» հղում անելով  իր աղբյուրին, գրել էր, թե հակամարտությունը կարգավորման համար գործելու է «ճանապարհային քարտեզ»:

Թերթի դիվանագիտական աղբյուրի փոխանցմամբ` սկզբում կստորագրվեն հիմնական սկզբունքները, ապա կողմերը ՌԴ-ի, ԱՄՆ-ի եւ Ֆրանսիայի միջնորդությամբ կսկսեն աշխատել խաղաղ պայմանագրի վրա:

Ըստ թերթի` Հայաստանը պարտավորվելու է վերադարձնել Լեռնային Ղարաբաղին հարակից 6 շրջանները, ինչպես նաև Լաչինի 13 գյուղեր, պահպանվելու է կապը Հայաստանի և Լեռնային Ղարաբաղի միջև: Անվտանգությունն ապահովելու են խաղաղապահ ուժերը:

Արցախում մի քանի տարի հետո անցկացվելու է հանրաքվե, որը, սակայն, կիրականացվի միայն փախստականների վերադարձի դեպքում:

Կողմերը հրաժարվելու են ուժի կիրառումից, ընդ որում՝ այդ  ամրագրվելու է իրավաբանորեն:

 

Այսօր նախագահների ընդունած հայտարարությունը` անմեղ թվալով, այնուամենայնիվ մտորելու տեղիք է տալիս` մասնավորապես . «Պետությունների ղեկավարները արձանագրեցին մի շարք հարցերի շուրջ փոխըմբռնման ձեռքբերումը, որոնց լուծումը կնպաստի Հիմնական սկզբունքներին հավանություն տալու համար պայմանների ստեղծմանը»:

 

Ինչի՞ շուրջ է եղել փոխըմբռման ձեռքբերումը եւ արդյո՞ք Սերժ Սարգսյանի կտեղեկացնի այս մասին Հայաստանի եւ Արցախի ժողովրդին:





Նոտարը «սարսափելի՞» է

23 05 2011

Չգիտեմ, թե ինչպես են ձեւավորվել իմ պատկերացումները նոտարների  մասին, սակայն նրանց հետ գործ բռնել ճիշտն ասած չէի ուզենա:  Նոտարիատ այցելել եմ  մեկ, թե երկու անգամ. առանձնապես խոշոր գործարք չեմ արել` դիպլոմի  պատճենի հաստատում, ծննդյան վկայականի թարգմանության հաստատում եւ… Ընդամենը  մի կնիքի համար սպասել եմ մոտ մեկ ժամ, վճարել այդ մի կնիքի համար նվազագույնը 3000 դրամ ու  հեռացել` չհասկանալով` ինչի համար եմ վճարում եւ ուր են գնում իմ վճարած գումարները: Ինձ ոչ ոք կտրոն չի տվել:

Չեմ զարմանում, երբ լսում եմ, որ ինչ-որ մի տեղ աշխատանքի ընդունվում են ծանոթով: Սակայն շատ զարմացա, երբ ծանոթս, ով հանձնել էր նոտարական թարգմանիչ աշխատելու  համար քննությունները ու ստացել հավաստագիր, այդպես էլ մեկ տարվա ընթացքում, մի գործ չունեցավ:

« Կարո՞ղ է ծանոթ նոտար ունենաս, որ ինձ գործ տա»,- մի անգամ ասաց նա,  եւ ես այդպես էլ չհասկացա, թե  նոտարի հետ ծանոթն լինելն այդ ինչ ուժ ու զորություն ունի պետական հավաստագրից առավել:

Այն, որ կարող է նոտարը տնից քեզ զրկել կամ քեզ տուն պարգեւել, այդ հասկացել եմ, բարեբախտաբար, ոչ մի անձնական փորձով:  Խմբագրություն այցելած , իրենց իսկ խոսքերով, նոտարի զոհերն են պատմել:  Չգիտես  ինչու` մշտապես, անկախ նրանից, թե ով էր այդ գործարքի հեղինակը, մշտապես շոշափվում էր Մարիամ Գաբոյանի անունը, որին ես անձամբ չեմ ճանաչում:

Բնական է սա, քանզի Մարիամ Գաբոյանը նոտարների «շեֆն է»: Եւ ահա 1990թ այս աթոռը զբաղեցնող Մարիամ  Գաբոյանն արդեն մի քանի օր է` արդեն  ՀՀ ԱՆ  Նոտարիատի բաժնի պետ  չէ. բաժինն էլ լուծարված է:

Մարիամ Գաբոյանը, բնականաբար, չի ընդունում այն մեղադրանքները, թե ինքը  ինչ-ինչ  գործարքներ է արել  ու սխալ է համարում այդ բաժնի լուծարումը թեկուզ եւ  որպես հերթական  բարեփոխում: Սխալ համարելով իրեն աշխատանքից փաստացի զրկումը( թեեւ նրան աշխատանքից չեն հեռացրել, այդ  «դարձրել» պահեստային կադր)` չի պատրաստվում դատարանով վերականգնել իր իրավունքները:

«Նախարարի հրամանը հրաման է»,-ասում է Մարիամ Գաբոյանը, որը վստահեցնում է, թե իր մասնագիտական հմտությունները թույլ կտան, որ ինքը «կարողանա իր օրվա հացի փողը վաստակել` շարունակելով նոտարական գործունեությունը»:

Չնայած ասում են,որ ինքը բնավ էլ «օրվա հացի» խնդիր չունի. իր վաստակածը բավարար է մինչեւ կյանքի վերջ ապահով ապրելու համար:

Չգիտեմ` ճիշտ է, սխալ, բայց դե` ասում են:

Սակայն փաստն այն է,որ քիչ չեն այն քաղաքացիները, ովքեր ուրախացան  Մարիամ Գաբոյանի բաժնի լուծարումից, հատկապես նրա պաշտոնանկությունից, չնայած այս բառը ոչ Արդարադատության նախարարությունն է ընդունում, ոչ էր արդեն նախկին գլխավոր նոտարը:

Ինչեւէ… առաջարկում ենք քննարկել «նոտարական» թեման: Երբեւիցե առիթ ունեցել եք նոտարական գործարք անելու, ինչպես եք գնահատում այս համակարգը, նաեւ   նախարար Հրայր Թովմասյանի վերջին որոշումը` բաժինը լուծարելու մասին:





Կտարածվի համաներումը քաղբանտարկյալների վրա?

21 05 2011

Հիմք ընդունելով Հայաստանի Հանրապետության Սահմանադրության 81-րդ հոդվածի առաջին մաuի 1-ին կետը և «Ազգային ժողովի կանոնակարգ» օրենքի 90-րդ հոդվածը՝ ՀՀ նախագահ Սերժ Սարգսյանն այսօր դիմել է ՀՀ Ազգային ժողովին՝ Հայաստանի Հանրապետության անկախության 20-րդ տարեդարձի կապակցությամբ համաներում հայտարարելու առաջարկությամբ: Տեղեկացնում է Նախագահի մամլո ծառայությունը:

Հայ ազգային կոնգրեսում չեն շտապում մեկնաբանել Սերժ Սարգսյանի կողմից ԱԺ-ին ներկայացրած համաներման առաջարկը: «Մենք հետեւենք զարգացումներին եւ հետո կարձագանքենք»,- այսօր «Ա1+»-ին ասաց ՀԱԿ-ի համակարգող Լեւոն Զուրաբյանը:

ՀՀԿ խոսնակ Էդուարդ Շարմազանովը Սերժ Սարգսյանի այս քայլը բացատրում է նրա մարդասիրությամբ: «Դա պետական եւ ազգային գործչին վայել քայլ է, որը դրական կազդի նաեւ ներքաղաքական վիճակի վրա: Մենք պարտավոր ենք լինել միասնական եւ մայիսի 28-ը շատ լավ առիթ է, որպեսզի իրականացվի համաներում: Համոզված եմ, որ այս այլ միայն դրական ազդեցություն կունենա»,- «Ա1+»-ին ասաց պարոն Շարմազանովը:

ՀՀԿ խոսնակը դժվարացավ, ասել թե այս համաներումը երբ եւ քանի անձի վրա կազդի, եւ արդյոք կազդի՞ 2008թ. մարտի 1-ի քրեական գործով դատապարտվածների վրա. «Ես իրավաբան չեմ, որ այդ հարցին պատասխանեմ: Ես միայն կարող եմ ասել, որ Սերժ Սարգսյանը համաներման առաջարկով դիմել է ԱԺ-ին, որպեսզի մարդիկ տոնից առաջ գնան իրենց օջախները»:

Էդուարդ Շարմազանովը առաջիկայում նախատեսված համաներումը չի գնահատում ՀԱԿ-ի 3 պահանջներից վերջինի՝ կատարում, համաձայն որի բոլոր քաղբանտարկյալները մինչեւ մայիսի 31-ը պետք է ազատ արձակվեն:

«Դա կարելի է դիտարկել որպես Սերժ Սարգսյանի քաղաքական գծի շարունակություն: Այս տարիների ընթացքում Սերժ Սարգսյանը ապացուցել է, որ իր խոսքն ու գործը չեն տարբերվում, որն ուղղված է երկրում միասնականության մթնոլորտի, համերաշխության եւ երկխոսության զարգացմանը»,-ասաց նա:

«Ժառանգություն» կուսակցության պատգամավոր Լարիսա Ալավերդյանը մարդկայնորեն ողջունում է Սերժ Սարգսյանի համաներման առաջարկը, սակայն ասաց. «Սա իրավական պետության կայացման ճանապարհ չէ»: Նա ուրախ է եւ համոզված, որ այս համաներման արդյունքում ազատ կարձակվեն նաեւ բոլոր քաղբանտարկյալները. «Բայց դրանց հարցը ոչ թե փակվում է, այլ բազմաթիվ հարցեր են առաջ գալիս: Մենք ոչ միայն պահանջում ենք, որ ազատ արձակվեն անմեղ մարդիկ, այլեւ պատժվեն մարտի 1-ի մեղավորները»:

ՀՅԴ պատգամավոր Արծվիկ Մինասյանի կարծիքով այսօր մեր երկրում իսկապես կա համաներման անհրաժեշտություն. «Ոչ միայն այն պատճառով, որ քրեակատարողական հիմնարկները չափազանց ծանրաբեռնված են, այլեւ լիցքաթափման անհրաժեշտություն կա, նաեւ այն անձանց առումով, ովքեր դատապարտվել են 2008թ. մարտի 1-ի դեպքերով»:

Պարոն Մինասյանը ողջունում է Սերժ Սարգսյանի համաներման առաջարկը եւ ասում. «Թեեւ համաներումն ուշացած է, սակայն կարեւոր քայլ է»: ՀՅԴ պատգամավորը դժվարացավ ասել, թե Սերժ Սարգսյանի այս քայլը ՀԱԿ-ի պահանջներից է, թե ոչ, սակայն նշեց. «Ակնհայտ է մի բան, երբ 2008թ. մարտի 1-ից հետո եղավ առաջին համաներումը, ՀՅԴ-ն առաջարկեց ընդհանուր, առավել լայն համաներում անցկացնել, որպեսզի լարվածությունը նվազի: Ցավոք, այն ժամանակ, մեր առաջարկը հավուր պատշաճի տեղ չհասավ: Զուտ երկխոսության կամ շախմատային քայլերի տեսակետից ավելի է այդ հարցը թողնենք շախմատ խաղացողներին եւ նրանց երկրպագուներին»:





Գնա՞լ Բաքու…

15 05 2011

  Եւ այսպես… «Եվրատեսիլի» շուրջ կրքերը թեժանում են, չնայած ընդամենն այս գիշեր հայտնի դարձավ այս տարվա մրցույթի հաղթողը: Այն բանից հետո, երբ պարզ դարձավ, որ «Եվրատեսիլ -2012» կայանալու է Բաքվում շնորհիվ այս երկրի ներկայացուցիչների հաղթանակի, հայ հասարակության համար ծնվեց` այս մրցույթի հետ կապված եւս մեկ քննարկման թեմա:

Մինչ շարունակվում են քննարկումները, թե ինչու Հայաստանը ներկայացնող երգչուհի Էմմին դուրս մնաց եզրափակիչ մրցույթից, սկսվում է քննարկումների նոր փուլ` գնա՞լ Բաքու, թե՞ ոչ:

Կամ հայ երգիչներից ո՞վ կհամաձայնի հաջորդ տարի ադրբեջանցի հանդիսատեսի առաջ երգել հայերեն: Ադրբեջանում կայանալիք “Եվրատեսիլ 2012”-ին մասնակցելու որոշումը պետք է կայացնի Հայաստանի Հանրային հեռուստատեսությունը, որը “Եվրատեսիլում” մեր երկրի պաշտոնական ներկայացուցիչն է:

 Հիշեցնենք, որ «Եվրատեսիլ-2011»-ի հաղթող են ճանաչվել Ադրբեջանի ներկայացուցիչները` Նիգար Ջամալ եւ Էլդար Գասիմով զույգը` ստանալով 221 միավոր: Ռուսաստանն ու Թուրքիան նրանց տվել են առավելագույն 12 միավորը: «Եվրատեսիլ 2011»-ում երկրորդ եւ երրորդ տեղերը զբաղեցրեցին Իտալիան եւ Շվեդիան` համապատասխանաբար 189 եւ 185 միավորներով:

Եզրափակչին մասնակցում էին քսանհինգ երկրների ներկայացուցիչներ: Հայաստանը առավելագույն 12 միավորը տվեց Ուկրաինային, 10-ը` Վրաստանին, 8 էլ` Ռուսաստանին:

 Եվ այսպես… սկսեցինք: Գնա՞լ Բաքու, թե՞… Ինչու՞ գնալ կամ ինչո՞ւ ոչ: Ո՞վ գնա…





Էմմին չհաղթահարեց արգելքը

11 05 2011

Հայաստանը ներկայացնող երգչուհի Էմմին չի երգի «Եվրատեսիլ-2011» եզրափակչում:

Քիչ առաջ Գերմանիայի Դյուսելդորֆ քաղաքում ավարտվեց «Եվրատեսիլ-2011» մրցույթի առաջին կիսաեզրափակիչը: Հայ երգչուհին չհայտնվեց լավագույն տասնյակում` ի տարբերություն Սերբիայի, Լիտվայի, Հունաստանի, Ադրբեջանի,Վրաստանի,Շվեյցարիայի, Հունգարիայի, Ֆինլանդիայի, Ռոսաստանի, Իսլանդիայի ներկայացուցիչների:

«Արենա» մարզադահլիճում միմյանց հետ մրցում էին «Եվրատեսիլ-2011» -ի մասնակից 43 երկրներից 19-ը: Առաջինը ելույթ ունեցավ Լեհաստանը, վերջինը`Հունաստանը:

էմմին ելույթ ունեցավ չորրորդը` «Boom Boom» երգով:էմմին բեմում հայտնվեց բռնցքամարտիկի հսկայական ձեռնոցի վրա բազմած, եւ բեմահարթակը վերածվեց ռինգի:

«Եվրատեսիլ»-ի եզրափակիչ համերգը կկայանա մայիսի 14-ին:

Ինչն էր պատճառը?? երգն էր վատը, թե հայերը ակտիվ չէին, թե մրցակիցներն էին ուժեղ??? Ձեր կարծիքը??

Կարելի եւ համեմատել ուղիղ կատարումը եւ ձայնագրությունը…





Պետք է վճարել ազատությա՞ն համար

3 05 2011

Այսօրվա գլխավոր թեման Մամուլի ազատությունն է, եւ այս քննարկումները սկսվել են դեռ երեկվանից, երբ «Freedom house» միջազգային կազմակերպությունը հրապարակեց իր հերթական զեկույցը: Հայաստանը վերստին  «ոչ ազատ» երկրների ցանկում է:

Սա էլ այնքան անսովոր չէ` «Ա1+»-ը եթերում չէ, իսկ  հայկական մամուլը մասնակի ազատից դարձավ անազատ 2002թ-ից, երբ եթերազրվեց «Ա1+»-ը:

Տրամաբանական է նաեւ, որ չէր կարող նույնիսկ մասնակի ազատ համարվել մի երկիր, որտեղ բանտում լրագրող կա` Նիկոլ Փաշինյանը:

Կամ երկիր, որտեղ թերթերը փակվելու առաջ են, քանի որ ցանկացած պահի ցանկացած մեկը կարող է նրան դատի տալ բարոյական փոխհատուցման պահանջով  ու «վերին կամքով» սնանկացնի թերթին կամ դարձնի նրան հերթական կամակատարը:  Իսկ այդ լիովին հավանական է թեկուզ այն պատճառով, որ այդ գործին լծվել է եւ օրինակ է ծառայում նախկին նախագահ Ռոբերտ Քոչարյանը, ով դեռեւս գործող ֆիգուր է քաղաքական դաշտում եւ , բնականաբար, առավել ենթակա է քննադատության:

Հայաստանում մամուլի  որոշակի ազատություն, իհարկե, կա:  Բայց թե ինչ գնով է այն հնարավոր պահել, այդ արդեն պետք է լրատվամիջոցի ներկայացուցիչ լինես, որ հասկանաս:

Ի  դեպ, ժամանակ առ ժամանակ հեռուստաընկերություններն էլ են հանկարծ ազատ դառնում, բայց այդ «արհեստական» ազատություն է, որը կարող է անհետանալ, երբ  վերանում է դրա «մեղավորը», օրինակ` եվրոպացի պաշտոնյան մեկնում է Հայաստանից:

Ինչեւէ , չմոռանանք, որ այսօր տոն է ու շնորհավորենք բոլոր նրանց, ովքեր կարեւորում են Մամուլի ազատության օրը:

Իսկ նրանց, ովքեր ասելիք ունեն, հրավիրում ենք մեր քննարկմանը եւ  իբրեւ «բացում» մեր առաջին հարցը`  արդյո՞ք  Հայաստանում մի օր մամուլը կլինի ամբողջովին ազատ:

Ազատ է արդյոք մամուլը Հայաստանում? Ինչ կարծիք ունեք Դուք:

Հայաստանում կան բազմաթիվ հեռուստաընկերություններ, թերթեր, կայքեր:

Արդյոք դրանց առկայությունը, քանակը, բազմազանությունը Ձեզ բավարարում է? Ամեն օր, բոլոր լրատվամիջոցները աշխատում են Ձեզ համար, որպեսզի գրավեն Ձեր ուշադրությունը:

Այսօր  եկեք քննարկենք-թե Դուք` ընթերցողներդ ինչ եք ուզում տեսնել, կարդալ?

Ի դեպ կարող եք եվ մասնակցել քվեարկությանը, որը գտնվում է էջի վերեւի աջ անկյունում:





Էջ՝ հատուկ Ձեզ համար

3 04 2011

Մրցույթ. Լավագույն «աչքը»

Հարգելի այցելու, եթե Դու

ք ականատեսն եք ոչ սովորական իրադարձության, ապա միացրեք Ձեր տեսախցիկը:  Ձեր նկարահանածը քիչ անց կարող եք ինքնուրույն տեղադրել «Ա1+»-ի նոր էջում` «ականատես» դարձնելով հազարների: Դրա համար անհրաժեշտ է պարզապես սեղմել մեր նոր` « Քո աչքերով» էջի «բեռնել» կոճակը:

«Ա1+»-ի այս էջը հատուկ Ձեզ համար է: Այն Ձեզ հնարավորություն է տալիս` մասնակից դառնալ նորությունների ստեղծմանն ու տարածմանը:

Դուք կարող եք նկարահանել ամեն ինչ, ինչը կհետաքրքրի նաեւ լայն հանրությանը:

Ձեր պատշգամբում հետաքրքիր ծաղիկ է ծաղկո՞ւմ, մի հապաղեք, նկարեք տեղադրեք այն Ձեր էջում` այդ գեղեցկությունը կիսելով բոլորի հետ:

Այստեղ չկան սահմանափակումներ: Սակայն մինչ լուսանկարի կամ տեսանյութի տեղադրելը ուշադիր ծանոթացեք ԿԱՆՈՆՆԵՐԻՆ: Օրինակ` մի ուղարկեք ծաղրանկարներ, մոնտաժված լուսանկարներ, դիմանկարներ:


Հիշեք, որ Ձեր հաջողված աշխատանքն, անպայման, գնահատականի կարժանանա: Լավագույններին ամեն ամիս սպասվում են խրախուսական մրցանակներ:
«Ա1+»-ը հայտարարում է ամենամսյա մրցույթ` երկու կատեգորիաներով` թե ֆոտո, թեեւ վիդեո նյութերի համար:

Նյութը տեղադրելիս` միշտ հարկավոր է նշել ՁԵՐ անունը, հեռախոսի համարը կամ email-ը` այսինքն` Ձեզ հետ կապ պահելու համար: Օրինակ` եթե Ձեր լուսանկարը կամ տեսանյութը լավագույնը ճանաչվի, ապա մենք կարիք կունենանք գոնե Ձեր email-ն իմանալու` այդ մասին Ձեզ տեղյակ պահելու համար:

«Ա1+»-ը երաշխավորում է, որ Ձեր կոնտակտային տվյալները գաղտնի կպահվեն ցանկացած պարագայում:

Դե, գործի անցեք: Ուշադիր նայեք Ձեր շուրջը, ստեղծեք Ձեր էջը` Ձեր աչքերով; Ժանրային սահմանափակումներ չկան. Ձեր տեսախցիկը կամ հեռախոսը կարող է ֆիքսել ամենալուրջ միջադեպից մինչեւ ամենազվարճալի պատմությունը:

Լավ չե՞ք տիրապետում համակարգչին կամ չե՞ք համարձակվում ինքնուրույն տեղադրել Ձեր տեսանյութը կամ լուսանկարը, հոգ չէ, այն դուք կարող եք ուղարկել a1plusnews@gmail.com հասցեով: Մի անհանգստացեք, եթե Ձեր ուղարկած նյութը մեր կայքում հայտնվում է ուշացումով: Այն հասանելի է դառնում է մոդերացիայից հետո: Ու բացի այդ , փորձեք ուղարկեք այն տեսանյութերը եւ լուսանկարները, որոնք, իրոք, արժանի են հանրային սեփականություն դառնալու:

http://www.a1plus.am/am/mediapod

Գրեք մեզ, ի՞նչ կարծիքի եք, արդյո՞ք դիտում եք « Քո աչքերով» էջը, արդյո՞ք փորձել եք նկար կամ վիդեո տեղադրել.

Մեզ հետարքիր է Ձեր կարծիքը.





Նա արեց մենա՞կ

15 03 2011

Մինչ Հայ ազգային կոնգրեսը հայտարարում է Ազատության հրապարակը վերանվաճելու իր վճռականության մասին, այսօր «Ժառանգություն» կուսակցության նախագահ  Րաֆֆի Հովհաննիսյանը փաստորեն արեց այդ:

Րաֆֆի Հովհաննիսյանը հացադուլ է  անում Ազատության հրապարակում  եւ չի պատրաստվում գիշերը լքել  այն:

Հացադուլն անժամկետ է, ոչ վերջնագիր, ոչ խնդրանք եւ ոչ էլ կոնկրետ պահանջներ Հովհաննիսյանը չի ներկայացնում:

«Ես որպես Հայաստանի քաղաքացի, որպես հայ մարդ ակնկալում եմ, որ Սերժ Սարգսյանը կունենա քաղաքական գիտակցություն, հայրենասիրություն եւ պետական մտածելակերպ, որպեսզի վեր կանգնի անցյալ շրջանի կուսակցականացման գործընթացից եւ Հայաստանը տանի դեպի առաջին ազատ եւ արդար ընտրություններ»,-  ասել է «Ժառանգության» ղեկավարը:

2008 մարտյան դեպքերից հետո Ազատության հրապարակը փակ է ընդդիմության համար:  Ինչքան փակ կմնա, դեռեւս պարզ չէ, քանի որ անկախ եղանակից իշխանությունը պատճառ է գտնում Հայ ազգային կոնգրեսին մերժելու ու այստեղ հանրահավաք չարտոնելու համար:

Ի դեպ, իշխանությունից բավականին «գաղափարներ են» պահանջվել այս ընթացքում: Ինչ  միջոցառում ասես չի կազմակերպվել այս երեք տարիների ընթացքում Ազատության հրապարակում` էլ համերգ, էլ Վերնիսաժ, իսկ մանկական ատրակցիոնները կարծես դարձել են  մշտական:

Րաֆֆի Հովհաննիսյանի ծայրահեղ այս քայլը կարո՞ղ է որեւէ բան փոխել այս իրավիճակում:

Առաջարկում ենք քննարկել:





Մանկապղծության մեղադրանք

9 02 2011

Մանկապղծության մեղադրանք

Այսօր հայտնի դարձավ, որ «Ախթալայի լեռնահարստացման կոմբինատ» ՓԲԸ-ի եւ «Մեթըլ Փրինս» կորպորացիայի սեփականատեր, ԱՄՆ քաղաքացի Սերոբ Տեր-Պողոսյանը ձերբակալվել է:

Նրան մեղադրանք է առաջադրվել Քրեական օրենսգրքի 140 հոդվածի հատկանիշներով` սեքսուալ բնույթի գործողություններին հարկադրելը:  Մեղադրանքը հաստատվելու դեպքում` նրան սպառնում  է  տուգանք` նվազագույն աշխատավարձի 200-ապատիկից 300-ապատիկի չափով, կամ ուղղիչ աշխատանքներով` առավելագույնը 2 տարի ժամկետով, կամ ազատազրկում 1-3 տարով: Ըստ ՔՕ այս հոդվածի` հանցագործության սուբյեկտներ կարող են լինել 16 տարին լրացած անձինք:

Գլխավոր դատախազությունը մանրամասներ է հաղորդել` տեղեկացնելով, որ գործի հարուցման համար հիմք է հանդիսացել  Ախթալա քաղաքի բնակիչ Վ. Փարսադանյանի հաղորդումը:

Պարզվել է, որ «Սերոբ ՏերՊողոսյանը 2009-2010թթ. ընթացքում, գումարների տրամադրմամբ նյութական օգնություն ցուցաբերելով Ախթալա քաղաքի անչափահաս բնակիչների, օգտագործելով վերջիններիս անչափահաս լինելու հանգամանքը, դրանով իսկ նրանց դնելով նյութական և այլ կախվածության մեջ, «Ախթալայի լեռնահարստացուցիչ կոմբինատ»-ի վարչական շենքի բնակելի տարածքում և Ախթալա քաղաքում գտնվող իր տանը պարբերաբար հարկադրել է իր հետ սեքսուալ բնույթի գործողություններ կատարելուն և համասեռամոլության»:

Նախաքննությունը շարունակվում է:

Քրեական գործի նախաքննության օրինականության նկատմամբ հսկողությունը իրականացնում է ՀՀ գլխավոր դատախազության Ազգային անվտանգության մարմիններում քննվող գործերով վարչությունը:

Այս ամբողջ պատմությունը հրապարակայնություն է ստացել վերջին մեկ ամսվա ընթացքում, մինչդեռ այս մասին Ախթալայում խոսվում է արդեն մի քանի տարի:

Մամուլի մեղադրական հոդվածներից հետո Սերոբ Տեր-Պողոսյանը  մի քանի օր առաջ նամակ   է տարածել, որում  մասնավորապես ասվում էր. «Ես ևս մեկ անգամ հրապարակայնորեն հերքում եմ իմ դեմ ուղղված բոլոր մեղադրանքներն ու հայտարարում, որ օրենքով սահմանված կարգով դիմելու եմ իրավապահ մարմիններին և պահանջելու, որպեսզի բացահայտեն իմ դեմ կազմակերպված «խեղկատակության» հեղինակներին ու պատվիրատուներին»:

Խոսվում է այն մասին, որ նվազագույնը 20 երեխա դարձել է նրա “զոհ” , որոնց մի մասն արդեն չափահաս է: Խոսվում է նաեւ այն մասին, որ ոստիկանություն հաղորդում է ներկայացվել այն բանից հետո, երբ Սերոբ Տեր-Պողոսյանը հրաժարվել է գումար տրամադրել  իր զոհերից մեկին` Վ. Փարսադանյանին:

Ինքը` «Մեթըլ Փրինս» կորպորացիայի սեփականատերը եւս  ասել է, որ Վ Փարսադանյանն ու նրա մայրն իր աշխատողներն են: Տղան իսկապես իրենից գումար է խնդրել, բայց ինքը հրաժարվել է տալ եւ նրանց սպառնալիքներին լուրջ ուշադրություն չի դարձրել:

Իհարկե, շատ տխուր եւ դաժան պատմություն է, քանզի շոշափվում են անչափահասների անուններ ու դժվար չէ պատկերացնել, թե այս  ինչ ազդեցություն կունենա նրանց ու հարազատների ճակատագրի վրա:

Սերոբ Տեր-Պողոսյանը, գործարար լինելուց զատ, մինչեւ 2010թ ավարտը  եղել է վարչապետի խորհրդականը, ոստիկանությանը կից հասարակական խորհրդի անդամ է:

Ասում են, որ ոստիկանությունն այս մասին  վաղուց է իմացել, սակայն թե ինչու հիմա որոշվեց գործ հարուցել, պարզ չէ:  Ինչո՞ւ են զոհերի հարազատները մինչ  օրս այս մասին լռել, այդ էլ է անհասկանալի:

Նկատենք նաեւ Սերոբ Տեր-Պողոսյանը հայ հասարակությանն առաջին անգամ հայտնի է դարձել հոկտեմբերի 27-ի ոճրագործությունից հետո՝ այդ քրգործի շրջանակներում:

Գլխավոր մեղադրյալներ` Հունանյան եղբայրները մտերիմ հարաբերությունների մեջ էին եղել մեծահարուստ սփյուռքահայի հետ, նա որոշակի օգնություն էր ցույց տվել նրանց, եղբայրներն անգամ իրենց մորը փորձել էին ամուսնացնել նրա հետ: Հոկտեմբերի 27-ի գործի նյութերում նշվում էր, որ նա մասոնական «Ռոտարի» ակումբի անդամ է, սակայն դատաքննության ժամանակ նրա անձն այդպես էլ չկարեւորվեց:

Սպասենք զարգացումներին:





Ո՞վ է իրական ընդդիմությունը

1 02 2011

Հեռակա բանավեճ է սկսվել Հայ ազգային կոնգրեսի եւ  «Ժողովրդական կուսակցության»  նախագահ Տիգրան Կարապետյանի միջեւ:  Այն բանից հետո, երբ Տիգրան Կարապետիչը զրկվեց հեռուստաեթերից, նրա  համար նոր խոսափող է  գտնվել,որը այս պահին արդեն Մատենադարանի հարակից տարածքում է:

«Պարզ ցուցիչներ կան, որոնք կարող են ցույց տալ տվյալ ուժը կեղծ, թե իրական ընդդիմություն է: Կասկածները ամենալավը ցրում է հենց իշխանությունը իր վերաբերմունքով: Ցուցանիշներն են, օրինակ, եթե հանրահավաքի օրը չեն փակում ճանապարհները, եթե ոստիկանները չեն խանգարում, եթե նրանց վրա բազազները չեն հարձակվում, համարձակվում է արդյոք տալ Սերժ Սարգսյանի անունը, թե ոչ: Բացի այդ, ժողովուրդը մարզերում հանրահավաքի մասին իմանում է միայն, երբ չի աշխատում մարզային տրանսպորտը: Հետեւեք, որ օրերին է դա լինում եւ կատարեք հետեւություններ»,- հայտարարել էր ՀԱԿ համակարգող  Լեւոն Զուրաբյանը:

Նրա այս հայտարարությանը հետեւ եց Տիգրան Կարապետիչի արձագանքը:

«Ո՞վ է ընդդիմությունը, նա, ումից իշխանությունը խլել է ունեցվածքը, թե՞ նա, ով ներկայանում է ընդդիմություն, սակայն նրան պատկանող օբյեկտներն ու բիզնեսը շարունակում են գործել»,- հռետորական հարց հնչեցրեց Տիգրան Կարապետյանը:

Այսօր վերջինս նաեւ ասել է, որ իր պայքարը քաղաքական է, այսինքն`  այլեւս Մատենադարանի հարակից հրապարակում չեն հավաքվելու ԱԼՄ-ն վերաբացելու պահանջով, այլ…

Առաջիկայում մի քանի հանրահավաքներ են սպասվում, որոնք հրավիրել է  թե ՀԱԿ-ը, թե Տիգրան Կարապետիչը:  Ո՞ւմ հանրահավաքներին են ավելի շատ մարդիկ հավաքվում. նաեւ այս հարցն է այս  պահին  բարձրացվում:

Կա նաեւ տեսակետ, որ ամեն ինչ արվում ՀԱԿ-ի հեղինակությունը փչացնելու եւ առաջիկա ընտրություններում նրա ձայները խլելու համար:

Իսկ դուք ի՞նչ եք կարծում:

ՀԳ   Կան նաեւ ընդդիմության այլ տարբերակներ.կարող եք մասնակցել քվեարկությանը, որը գտնվում է վերեւի աջ անկյունում;

 





Կարապետիչին տեղափոխեցին այլ դաշտ . ում է ձեռնտու՞

20 01 2011

«ԱԼՄ հոլդինգ»-ի ղեկավար Տիգրան Կարապետյանն  Մատենադարանի տարածքում անցկացրած հանրահավաքի ժամանակ վերջնագիր ներկայացրեց իշխանություններին` պահանջելով մինչեւ փետրվարի 28-ը վերջ տալ ապօրինություններին: Հակառակ դեպքում, նա հայտարարեց, որ պահանջելու են արտահերթ ընտրություններ եւ նոր իշխանություն:

Նշենք, որ գիշերը ՀՌԱՀ-ի որոշմամբ` «ԱԼՄ հոլդինգը» կեթերազրկվի:

Կարծես թե մի քանի կայաններ էլ այլեւս չեն գործի այսօրվանից TV5, ԱՐ կամ Հայրենիք, ու էլի մի քանիսը իրար կմիանան.

Հանրահավաքն այսօր սկսվեց մեկ ժամ ուշացումով. «ԱԼՄ հոլդինգ»-ի եւ Ժողովրդական կուսակցության ղեկավար Տիգրան Կարապետյանը մինչեւ հարթակին մոտենալը ողջագուրվում էր բոլոր ցանկացողների հետ: Բացի այդ` նա հավաքվածներին բաժանեց իր հեռախոսահամարները, որպեսզի բոլորի հետ իր ասելով` «կապի մեջ լինի»:

Իր ելույթի մեջ Տիգրան Կարապետյանը չմոռացավ հիշել նաեւ քաղբանտարկյալներին` պահանջելով անհապաղ ազատ արձակել նրանց:

Տիգրան Կարապետյանը, մատնացույց անելով հավաքված խիտ բազմությանը, իշխանություններին մեղադրեց ստելու մեջ, թե իր հանրահավաքին միայն մի քանի հարյուր տատիկ ու պապիկ են մասնակցում: Նա հավաքվածներին կոչ արեց չհանդուրժել ոչ մի անարդարություն, որոնք պարտադրում են իշխանությունները:

«Ես արդարության մասին շատ չեմ խոսում` եկեք ասենք ամոթ նրանց: Ես վճռականորեն եմ տրամադրված, որովհետեւ ես ունեմ ձեր դաբրոն: Հիմա տալիս ե՞ք ձեր դաբրոն»,- դիմելով հավաքվածներին` հարցրեց Տիգրան Կարապետյանը, որին հաջորդեց միահամուռ «այո»-ն: «Ջան… ուրեմն ես կարող եմ գործել համարձակ»,- հայտարարեց նա:

Հանրահավաքի ժամանակ հնչեց 20 կարգախոս` «Մի բռնաբարեք ազատությունը», «Ոչ թալանին» եւ այլն: Տիգրան Կարպետյանը բոլոր քաղաքական ուժերին հրավիրեց միանալ իրեն ու միասնական ճակատով պայքարել իշխանությունների ապօրինությունների դեմ:

Ի դեպ, հանրահավաքին այսօր ելույթ ունեցան ԱԺ պատգամավոր Վարդան Խաչատրյանն ու ՀԱՍԿ ղեկավար Մովսես Շահվերդյանը:

Հանրահավաքի ավարտին Տիգրան Կարապետյանը հավաքվածներին կոչ արեց փետրվարի 28-ին գալ եւ մասնակցել իր կազմակերպած հանրահավաքին, որն ըստ նրա` բեկումնային է լինելու:

Ինչ կասեք՞, եկեք քննարկենք.

Մասնակցեք հարցմանը  էջի աջ վերեւի անկյունում::





Ինչպես Տիգրան Սարգսյանը կարող է դիտել «Ա1+»

25 12 2010

«Լրագրին» տրված հարցազրույցում վարչապետ Տիգրան Սարգսյանը, ի թիվս այլ հարցերի, անդրադառնում է նաեւ «Ա1+»-ի խնդրին: Չանդրադառնալով նրա` «Ա1+»-ի վերաբերյալ մեկնաբանություններին`  պարզապես մի դիտարկում:

«Իսկ Ա1-ը, եթե հասկանում է աշխարհում  ինչ է կատարվում, եթե այդ ֆինանսական հնարավորություններն ունի, ինքն այսօրվանից պետք է մտնի ինտերնետային դաշտ եւ իր հեռուստաալիքը ստեղծի, եւ ոչ մի սահմանափակում այնտեղ չկա: Իմ տպավորությունն ուրիշ է, որ իրենք հատուկ են սա անում, որ ուղղակի քաղաքական աժիոտաժ լինի, քաղաքական աղմուկ լինի»,-ասել է  Տիգրան Սարգսյանը:

Ի գիտություն  «ինտերնետից շատ ինֆորմացիա ստացող» վարչապետի` ուզում ենք հայտնել, որ «Ա1+»-ը արդեն 4 ամիս  է` հեռարձակվում է ինտերնետում` բոլոր հնարավոր միջոցներով` wmv եւ flash: Մենք ունենք youtube-ում մեր էջը, որում տեսանյութեր ենք տեղադրում արդեն երեք տարի: Մոտ մեկ տարի էլ «Ա1+»-ը հնարավորություն էր ստեղծել իր հաղորդումները դիտել մոբայլ տարբերակով:

Իսկ ինչպե՞ս վարչապետը կարող է  դիտել մեր հաղորդումները:

Քայլ առաջին` այցելեք «Ա1+»-ի ինտերնետային կայք` http://www.a1plus.am.

Քայլ երկրորդ` սեղմեք մեր կայքի կենտրոնում` անմիջապես գովազդային բաներների տակ գտնվող նկարը, որի վերեւում գրված է Ինտերնետային հեռարձակում:

Այս նկարի վրա գրված է Արագ կապ եւ Դանդաղ կապ, որը երեւում է միայն Հայաստանից դիտելիս: Այսինքն` կա հնարավորություն` ընտրելու այն հեռարձակումը, որը համարժեք է Ձեր օգտագործած կապի որակին:

«Ա1+»-ը եթերում է ժամը 13.30-ից մինչեւ 20-ը:

Մեր ինտերնետային հաղորդումների հիմնական առանցքը լրատվական թողարկումներն են: Սկսած ժամը 13.45-ից` յուրաքանչյուր ժամը մեկ եթերում «Այբ-Ֆե»-ն է` օրվա քաղաքական, տնտեսական, մշակութային իրադարձությունների լուսաբանմամբ:

Երեկոյան` «Այբ-Ֆե»-ի հիմնական թողարկման ավարտից անմիջապես հետո` ժամը 19.10-ին, հայտնի լրագրող Արամ Աբրահամյանը Ձեզ հրավիրում է դիտելու «Հետգրություն» հաղորդումը, որի ընթացքում տարբեր բեւեռներ ներկայացնող քաղաքական, հասարակական, մշակութային գործիչները պետք է դիմակայեն Արամ Աբրահամյանի սուր հարցադրումներին:

Ի  դեպ, «Ա1+» ինտերնետային հեռուստատեսությունը, ամանորյա տոների հետ կապված, դեկտեմբերի 27-ից հունվարի 10-ը կլինի արձակուրդում:

Հարգելի ընթերցող, մենք Ձեզ մաղթում ենք տոնական հաճելի տրամադրություն:

Կհանդիպենք Ամանորից հետո:

Հետգրություն

Չցանկանալով հանդերձ մեկնաբանել Տիգրան Սարգսյանին`  այնումենայնիվ, չենք կարող չանդրադառնալ նրա մի մտքին:

« Ինչքանով ես այդ խնդրից տեղյակ եմ, Ա1+-ում տեղի է ունեցել կեղծարարություն: Շատ պրիմիտիվ մի բան է տեղի ունեցել: Հիմա թող համապատասխան իրավապահ մարմինները, իրավասու մարմինները տան դրա գնահատականը` Ա1+-ը կեղծարարություն արե՞լ է, թե ոչ: Դա ազատությունների հետ ոչ մի կապ չունի»,-ասել է վարչապետը:

Ուզում ենք տեղեկացնել, որ «Ա1+»-ը դիմել է դատարան` ընդդեմ ՀՌԱՀ-ի:

Հունվարի 11-ին Վարչական դատարանը կլսի «Ա1+»-ի հարցը:

Իսկ ընդհանրապես անմեղության կանխավարկածին հետեւելը  բոլորի համար, այդ թվում` վարչապետի, վատ չէր լինի, մանավանդ որ խնդրին տեղյակ ես լինում «ինչքանով որ»:





Բեգլարյանը հրաժարական է տվել

8 12 2010

Երեւանի քաղաքապետ Գագիկ Բեգլարյանը  հրաժարականի դիմում է ներկայացրել:

Սա քիչ առաջ հաստատեց  Երեւանի քաղաքապետարանի մամլո ծառայությունը: Պատճառների մասին ոչինչ չի նշվում: Դիմումը պետք է քննարկվի ավագանու նիստում:

Հիշեցնենք, որ ավելի վաղ Նախագահականում հաստատել էին լուրերը, որ Երևանի քաղաքապետ Գագիկ Բեգլարյանի և Սերժ Սարգսյանի արարողակարգի բաժնի աշխատակից Արամ Կանդայանի միջև խնդիրներ են ծագել։

«Այո, ցավոք, միջադեպ տեղի ունեցել է: Իհարկե, մեր մամուլը դեպքերի իր նկարագրության մեջ դրանք չափազանցրել է։ Մասնավորապես, չի եղել ոչ առևանգում, ոչ էլ դաժան ծեծ: Բայց այդպիսի դեպք, իսկապես, տեղի ունեցել է»,- ասել է ՀՀ նախագահի մամլո խոսնակ Արմեն Արզումանյանը։

«ՀՀ նախագահը բազմիցս արտահայտել է իր հստակ դիրքորոշումը նմանօրինակ արարքների վերաբերյալ: Այդպիսի վարքագիծն անընդունելի է և անհանդուրժելի: Իսկ պետական պաշտոնյայի դեպքում` առավել ևս»,- ավելացրել է նա:

Միջադեպը տեղի է ունեցել աշխարհահռչակ տենոր Պլասիդո Դոմինգոյի համերգից հետո:  Համերգի ժամանակ Արամ Կանդայանն առաջարկել է Բեգլարյանի տիկնոջն ու նրա ընկերուհուն նստել ոչ թե հրավիրատոմսում նշված, այլ` ուրիշ տեղում:

Ըստ մամուլի հրապարակումների`սա էլ դարձել է միջադեպի առիթը:

Հրաժարականի հաստատման դեպքում` մեկ ամսվա ընթացքում` մինչեւ հունվարի 8-ը, Երեւանի ավագանին պետք է ընտրի նոր քաղաքապետ: