“Սպանություն չի եղել, սպանված մարդ չի եղել”

ԱԺ-ի Մարտի 1-ի դեպքերն ուսումնասիրող ժամանակավոր հանձնաժողովի գործունեությունը գնալով ավելի անհեթեթ է դառնում. ամիսներ շարունակ այս հանձնաժողովը փորձում էր պարզել, թե ժամը քանիսին է սկսվել եւ ավարտվել խաղաղ ցուցարարներին ՚Ազատությանՙ հրապարակից ցրելու օպերացիան, հետո փորձում էին հայ հասարակությանը մոլորության մեջ գցել` պնդելով, թե շրջանառության մեջ դրված տեսաֆիլմը մոնտաժված է, իսկ դրանում տեղ գտած կադրերը, որում արտացոլված են մարդկային ծնոտ, կամ արյուն, չեն համապատասխանում իրականությանը:

՚Ա1+ՙ հեռուստաընկերության նախագահ Մեսրոպ Մովսեսյանը պնդում է, որ խնդրո առարկա կադրերը ՚Ա1+ՙ-ինն են եւ հում, չմոնտաժված կադրեր են ՚Ա1+ՙ-ը նախաքննական մարմնին արդեն ուղարկել է վերը նշված կադրերը՝ դրան նախորդած եւ հաջորդած տեսաշարով, նաեւ թվային արձանագրությամբ՝ օրացույցով եւ վայրկյանացույցով: Ի դեպ, նախաքննության մարմինը հրավիրել է մեր օպերատորներից երկուսին հարցաքննության՝ որպես վկա: Քննիչն ի թիվս այլ հարցերի, հարցրել է նաեւ՝ ՚Ձեր աչքի առաջ սպանություն եղե՞լ էՙ: Օպերատորները, որոնք թեեւ տեսել են դիակներ, բայց բուն սպանության փաստը չեն տեսել, բնականաբար ասել են՝ ՚ոչՙ: Քննիչը անմիջապես պահանջել է` ՚դե գրեք, որ ձեր աչքի առաջ սպանություն չի եղելՙ:

՚Ա1+ՙ-ի նախագահ Մեսրոպ Մովսեսյանը տարակուսած նկատում է. ՚Ոնց որ թե մարտի 1-ին սպանություններ չեն եղել, որովհետեւ ստորագրություններ են վերցնում մեր օպերատորներից, թե իրենք իրենց աչքով սպանություն չեն տեսել: Ստացվում է՝ սպանություն չի՞ եղել, սպանված մարդ չի՞ եղելՙ,- ասաց պարոն Մովսեսյանը եւ ավելացրեց, որ կադրերում առկա են սպանվածներ՝ փողոցում ընկած, ավտոմեքենայի տանիքի վրա տեղափոխելիս, հիմա դա ի՞նչ է նշանակում` օպերատորը տեսե՞լ է սպանությունը, թե՞ չի տեսել. ոնց ուզեն, կարող են իրենց տրամաբանությամբ մեկնաբանել. ՚Դա իրենց խնդիրն է. մեր խնդիրը եղել է ֆիքսել իրադարձությունները, եւ պատմությունը խեղաթյուրել ոչ մեկը չի կարող, դրա հստակ ապացույցներն են այն չնչին կադրերը, որ պահպանվել են մեզ մոտ, որովհետեւ մնացած բոլո տեսաերիզները առգրավել են ոստիկանության, ՊՆ եւ ԱԱԾ աշխատակիցները: Ես պնդում եմ, որ այդ կադրերը մոնտաժված չեն, դա հում կադրերն են, որը մենք նաեւ տրամադրել ենք քննչական մարմիններին`իսկությունը պարզելու համարՙ:Մեսրոպ Մովսեսյանը նկատեց, որ խնդրո առարկա կադրերը մարտի 1-ի դեպքերն ուսումնասիրող հասարակական խորհրդի անդամ Սուրեն Աբրահամյանի խնդրանքով, տրամադրվել են այդ հանձնաժողովին. ՚Ես ցանկացած լաբորատորիայում եւ ցանկացած հանձնաժողովում կապացուցեմ, որ այդ կադրերը մոնտաժված չեն, հում նյութ է, եւ ոչ թե նկարված է որեւէ սպանդանոցում, կամ անասնագոմում, այլ Երեւանում` Պարոնյան փողոցում, որտեղ տեղի են ունեցել դեպքերը, իսկ դրա ապացույցն է ժամանակակից տեխնիկան, ոչ թե ես կամ իմ հայտարարությունները: Իրենք հիմա փորձում են պաշտպանվել հիմարության աստիճանի վատՙ:

Ինչ վերաբերում է այդ չարաբաստիկ կադրերի հեղինակ օպերատորին, ապա նա այժմ արձակուրդում է եւ կվերադառնա միայն հոկտեմբերի 25-ից հետո: Նկատնեք նաեւ, որ նա պատրաստ է պատասխանել ցանկացած հարցի, թեեւ հում կադրերը նրա փոխարեն կպատասխանեն հանձնաժողովի անդամներին հետաքրքրող հարցերին: Եվ նկատենք, որ մեր օպերատորը այդ կադրերը նկարելուց հետո ուղիղ 7 ամիս Հայաստանում էր, սակայն որեւէ մեկի մտքով չանցավ հարցեր տալ նրան:

Ի դեպ, եւս մեկ նրբություն. ՚Ա1+ՙ-ին տված հարցազրույցում խորհրդարանական հանձնաժողովի նախագահ Սամվել Նիկոյանն ասել էր, թե շատ լավ է, որ ինքը միջանկյալ զեկույց չի ներկայացրել, քանի որ չէր տեսել այն կադրերը, որտեղ ոստիկանները Հանրապետության հրապարակում շարունակում են ՚օպերացիանՙ՝ դաժան ծեծելով ցուցարարի: Տեսաֆիլմի հեղինակներից ճշտեցինք, որ այդ կադրերը ոստիկանության նկարահած կադրերն են. ստացվում է՝ կամ ոստիկանությունը չի վստահել Նիկոյանին եւ չնայած բազմաթիվ դիմումներին չի տրամադրել հանձնաժողովին իր ունեցած կադրերը, կամ Սամվել Նիկոյանը, ունենալով այդ կադրերը, հանձնաժողովի դատին չի ներկայացրել, թաքցրել է: ՚Հիմա խնդիրը ոչ թե կատարված փաստերը սրբագրելն է, այն էլ` փնթի, անշնորհք, այլ կատարվածը վերլուծելն ու դրանից հետեւություններ անելըՙ,- հանձնաժողովին խորհուրդ տվեց Մեսրոպ Մովսեսյանը: