7-ի գործը “փակուղում”. անվերջ դատավարությո՞ւն

ԵԽԽՎ ապրիլյան նստաշրջանից առաջ հայակական դատական “ռեժիմի” մոտեցումները դրսեւորվում են արդեն ավանդական`ձգձգումների հիմա արդեն նորարարական աճպարարություններով: Անհասկանալի /գոնե այս պահին/ տրամաբանությամբ “ջոկում են” “մեղավորներին, մեղադրանքը ներկայացվում է 9 օրում 42 հատոր գործ ուսումնասիրելուց հետո, գործի քննության ընթացքում հեռացնում են դատարանի դահլիճից մեղադրյալներին, ապա պաշտպաններին, իսկ երբ հաստատվում է “օրենքի” փոփոխությունունը, լրացուցիչ ժամանակ է տրամադրվում մեղադրանքները “թարմեցնելու” համար… Կարճ ասած` Կաֆկան հանգստանում է… Աբսուրդ…

“7-ի գործը” ի սկզբանե ընթանում էր “առանձնակի” լարվածությամբ, չնայած ժամանակ առ ժամանակ կուլմինացիան մոտ էր թվում: Այնուամենայնիվ, “7-ի գործի” դատավարությունը կվերսկսվի ապրիլի 1-ին: Հիշեցնենք, որ հետաձգվել է այն “ՀՀ քրեական օրենսգրքում փոփոխություններ և լրացումներ կատարելու մասին” նախագահ Սարգսյանի վավերացումից հետո եւ մեղադրող կողմը 225-րդ և 300-րդ հոդվածների փոփոխությունների վերաբերյալ ժամանակ է խնդրել` իր դիրքորոշումները ճշտելու և դատարանին ներկայացնելու համար:

Ի՞նչ է նշանակում լինել հանրապետական…

2 տարի առաջ այսօր “Սկսելա” շարժման հերթական ակցիան էր, օրը կիրակի, ու մենք լրագրողներով ակցիայի մասնակիցների հետ անցնում էին հանրապետության հրապարակով, երբ ոստիկանները մոտեցան եւ խնդրեցին չաղմկել. “վարչապետը մահացել է”: Ես զանգեցի խմբագրություն, ինձ չհավատացին: Այսօր Անդրանիկ Մարգարյանի հիշատակի մասին խոսում են որպես մարդու, ով ապրեց ոչ կարճ, ոչ երկար… “նա ապրեց լեցուն կյանքով” ու Պանթեոնում ՀՀ պետական ողջ վերանախավը նախագահի գլխավորությամբ, ծաղիկներ է դնում նրա գերեզմանին ու խոսում ՀՀ ամենաերկարակյաց վարչապետի, անմնացորդ նվիրված պետական գործչի ու ընկերոջ մասին:

Երեւանի ՏԻՄ ընտրություններ. ընդդիմությունը ռեւա՞նշ է վերցնում

ԿԸՀ սահմանված ժամանակացույցով Երեւանի ՏԻՄ ընտրություններին մասնակցելու հայտ ներկայացրեցին Բարգավաճ Հայաստանը, Հայ ազգային կոնգրեսը, Օրինաց երկիրը, Հանրապետականը, Դաշնակցությունը, Ժողովրդական կուսակցությունը: Խորհրդարանական “Ժառանգություն” խմբակցությունը որոշում կայացրեց չմասնակցել ընտրություններին, այնինչ մինչեւ երեկ դեռ քննարկվում էր ՀԱԿ-ի հետ միասնական ցուցակով կամ առանձին հանդես գալու տարբերակը: Ընդդիմության կամ կոալիցիայի իրական կամ թվացյալ առանձին հանդես գալու հանգամանքը, քաղաքական ենթատեքստերը ամենաանկանխատեսելին են դարձում: Սակայն, ակնհայտ է, որ Երեւանի ընտրված քաղաքապետը այլեւս երկրի առանցքային քաղաքական պատասխանատու պաշտոններից մեկն է լինելու եւ պատահականություններ ենթատեքստերում լինել չեն կարող:

Ըստ ամենայնի, այս ընտրություններով գործող իշխանությունները երկու հավանական ելքերով հնարավորություն ունեն կամ լեգիտիմացնելու իրենց ռեժիմը եւ երկրի ղեկավարման պատասխանատվությունը կիսելու ընդդիմության հետ, կամ ամեն գնով կառչելու երկրի ղեկավարման առանցքային պաշտոններից մեկը եւս սեփական հսկողության տիրույթում պահելու հնարավորությունից: Մասնակցության հայտ ներկայացրած մյուս կուսակցությունների հանդեպ արդար լինելու համար արժի նշել, որ պետք չէ բացառել որեւէ այլ ելք այս ընտրությունների համար: Համենայն դեպս գոնե հիմա այդքան էլ պարզ չէ ինչու է կոալիցիան իրարից ձայներ խլում եւ ինչ պայմանավորվածություններ կան հակադիր եւ միեւնույն հարթություններում: Եթե կոալիցիոն կուսակցությունների մասնակցությունը “արդարության” իմիտացիայի համար է, ուրեմն ՀՀԿ-ն սեփական գործելաոճի չափազանց ռիսկային ուղի է ընտրել:

Թեժ քաղաքական շաբաթ. իսկ “Ժառանգությունը” ի՞նչ կասի

Անցնող շաբաթվա ներքաղաքական կյանքում Երեւանի ավագանու ընտրությունը իր ենթաթեմաներով թերեւս միանձնյա “թոփ նյուզ”-ի կարգավիճակում կլիներ, եթե քաղաքական քննարարկումների դուռը չթակեր ֆինանսական ճգնաժամ ու վերջինիս հաղթահարման իմիտացիային ուղղված ծրագրերի քննարկումը: Անցնող շաբաթվա վերջին օրը 48 կուսակցությունների ղեկավարները ընդունել էին Սերժ Սարգսյանի հրավերը դռնփակ նիստում քննարկելու «Համաշխարհային ֆինանսատնտեսական ճգնաժամը եւ Հայաստանը» թեման:

«Մի թյուրըմբռնում կա, որին ուզում եմ անդրադառնալ: Դա այն ընկալումն է, որ ճգնաժամը զուտ ֆինանսական եւ տնտեսական բնույթ ունի’ դրա արդյունքում ձեւավորված սոցիալական հետեւանքներով: Համաշխարհային ճգնաժամը մեծ մարտահրավեր է քաղաքական դաշտին, արժեհամակարգին ու բարոյականությանը: Թե ով իրեն ինչպես է դրսեւորում ճգնաժամի ժամանակ, ցույց է տալիս նրա արժանիքները, բարոյականությունը ու քաղաքական պատասխանատվություն վերցնելու աստիճանը: Անշուշտ, ամենահեշտը նստել քննադատելն է, եւ սա, իհարկե, նաեւ անվտանգ է,- ասում է Սերժ Սարգսյանը “ակնհայտ” ենթատեքստով:

“Լեւոն քաղաքապե՞տ”. ՀԱԿ ցուցակը կգլխավորի Լեւոն Տեր-Պետրոսյանը

ՀԱԿ-ը հայտնում է, որ մարտի 15-ին տեղի է ունեցել Հայ ազգային կոնգրեսի Քաղաքական խորհրդի եւ կենտրոնական գրասենյակի համատեղ նիստ` ՀՀ առաջին նախագահ Լեւոն Տեր-Պետրոսյանի մասնակցությամբ եւ որոշում է կայացվել, որ Երեւանի քաղաքապետի ընտրություններին Հայ ազգային կոնգրեսի ցուցակը կգլխավորի Լեւոն Տեր-Պետրոսյանը:

“Նիստի ընթացքում քննարկվել են առաջիկա քաղաքապետական ընտրություններին առնչվող հարցեր: Քննարկման ընթացքում մասնակից կուսակցությունները հայտնել են այն կարծիքը, որ հաշվի առնելով Երեւան քաղաքի էական կշիռը երկրի քաղաքական եւ տնտեսական կյանքում, այս ընտրություններն անհրաժեշտ է դիտարկել, որպես երկրում սահամանդրական կարգը վերականգնելու առանցքային փուլ: Նիստում ընդունված որոշման համաձայն Հայ ազգային կոնգրեսը կմասնակցի Երեւանի քաղաքի քաղաքապետի ընտրություններին: Կոնգրեսի ցուցակը կգլխավորի ՀՀ առաջին նախագահ Լեւոն Տեր-Պետրոսյանը: Մեկ այլ որոշմամբ` Հայ ազգային կոնգրեսին մաս կազմող կուսակցությունները կենտրոնական գրասենյակին լիազորել են քննարկել «Ժառանգություն» կուսակցության առաջարկը` ընտրություններում միասնական ցուցակով հանդես գալու վերաբերյալ

Հերթական անգամ լրագրող են ծեծել

Այսօր հերթական անգամ ծեծի է ընթարկվել ֆոտոլրագրող Գագիկ Շամշյանը, ով ներկայումս ծանր վիճակում է եւ գտնվում է վերակենդանացման բաժանմունքում: Կոլեգաս, որ նոր հիվանդանոցից վերադարձավ հաստատեց վերջինիս առողջական ծանր վիճակի մասին:

Միջադեպը, տեղի է ունեցել Բրյուսովի անվան պետական լեզվաբանական համալսարանի, որտեղ Շամշյանը ցանկացել է լուսանկարահանումներ անել, ինչի համար ծեծի է ենթարկվել անվտանգության աշխատակիցների կողմից: Շամշյանը պատմել է, որ ինքը Լեզվաբանական համալսարանի ուսանողների ակցիայից հետո մյուս լրագրողների հետ գնացել է հիշյալ բուհ եւ ցանկացել է ստանալ նաեւ համալսարանի ղեկավարության կարծիքը: Անվտանգության աշխատակիցների հետ լեզվակռիվ է սկսվել, որից հետո իրեն ծեծի են ենթարկել: Ըստ լրագրողի` ծեծողների մեջ է եղել նաեւ բուհի
պրոռեկտորներից մեկը:

Գագիկ Շամշյանը իր մասնագիտագիտական գործունեության ընթացքում բազմիցս բռնությունների է ենթարկվել, սակայն նման ծանր վնասվածքներ առաջօմ անգամ է ստանում: Նրա վրա հարձակվողները նրան խփել են նաեւ վայր ընկած ժամանակ: Ֆոտոլրագրողի ստացել է ուժեղ հարվածներ գոտկատեղից ներքեւ: “Նույնիսկ մեր օլիգարխների սափրագլուխներն այսքան դաժան չէին գտնվել իմ նկատմամբ”,-պատել է նա:

“Միասինը” ցեխը գցեց բոլոր դասախոսներին միասին

Այսօր Երեւանի բազմաթիվ ուսանողներ հնարավորություն էին ստացել տրորելու եւ պատռելու ցեխաջրերի մեջ նետված իրենց դասախոսների նկարները: “Միասին” երիտասարդական շարժումը, որ որոշել էր ամոթանքի անձնավորված տարբերակով պայքարել բուհերում գոյություն ունեցող կոռուպցիայի դեմ, Երեւանի տարբեր բուհերի, կենտրոնական փողոցների անցումների, ինչպես նաեւ ՀՀ Կրթության եւ գիտության նախարարության շենքի մերձակա տարածքում փակցրել էին “կաշառակեր” պիտակավորմամբ բազմաթիվ դասախոսների նկարներ, ինչպես նաեւ թռուցիկի տարբերակով նկարներ, որոնք թափված էին ցեխաջրերում:

“Մենք հետեւողական ենք եւ վճռական: Մենք ապացուցում ենք, որ չենք երկմտի լուծել մեր առջեւ դրված եւ ոչ մի խնդիր, եւ պայքարը կհասցնենք իր տրամաբանական ավարտին”,-ասված է թռուցուկում: Իհարկե միանշանակ չի կարելի ասել` ինչ “տրամաբանական ավարտի” մասին է խոսքը եւ ինչ տրամաբանությամբ, բայց փաստ է, որ նախաձեռնության այս դրսեւորումը ոչ միանշանակ ընդունվեց շատերի կողմից… Մյուս կողմից գուցե շատ լավ մեթոդ է կոռուպցիայի դեմ արմատներից ու կոշտ միջոցներով պայքարելու համար…

Օմբութսմենը իշխանության եւ ընդդիմության ձեռքը կրակն է ընկե՞լ, թե՞…

Մարդու իրավունքների գրասենյակի ամենամյա զեկույցը հաստատում է, որ Հայաստանում մարդու իրավունքների ճգնաժամային լինելը եւ 275 էջերում ընդգծում իրավիճակի լրջությունը: Զեկույցը չի շրջանցում նաեւ ՀՀ Գլխավոր դատախազությանը: “Այսօր ռեպրեսիվ համակարգի հիմնասյուներն են, հատկապես, Դատախազությունը եւ Հատուկ քննչական ծառայությունը”,-այսօր հայտարարել է ՀՀ մարդու իրավունքների պաշտպան Արմեն Հարությունյանը ապա նշել, որ դրա ապացույցն է ՀՔԾ աշխատանքի ոճն է, որի արդյունքում Մարդու իրավունքների պաշտպանի գրասենյակը ստանում է բազմաթիվ բողոքներ այն մասին, որ “մարդկանց ստիպում են տալ ինքնախոստովանական ցուցմունքներ կամ ցուցմունքներ՝ երրորդ անձանց դեմ”:

Չի լռում նաեւ ՀՀ Գլխավոր դատախաղությունը եւ վերջիններիս պատասխանը մարդու իրավունքների պաշտպանի հայտարարությունը մերկապարանոց է որակում: “Հավատարիմ մնալով որդեգրած իր աշխատաոճին, պաշտպանը, մասնավորապես, դատախազության աշխատանքների եւ գործունեության վերաբերյալ հնչեցվող իր գնահատականներում մշտապես ձեռնպահ է մնում դրանք հիմնավորող կամ նման եզրակացության հանգեցրած կոնկրետ դեպքերի մատնանշումից, ինչը հիմք է տալիս ենթադրելու, որ պաշտպանն ուղղակի զբաղված է անձնական քարոզչությամբ”,-ասված է դատախաղության տարածած հաղորդագրությունում:

Շնորհավոր մարտի 8

1857թ-ի Մարտի 8-ին Նյու-Յորքի տեքստիլային ֆաբրիկայի բանվորուհիներւ երթ կազմակերպեցին քաղաքի փողոցներով` բողոքելով ցածր աշխատավարձի ու աշխատանքահին ոչ բարենպաստ պայմանների համար:

1910թ-ին Կոպենհագենում տեղի ունեցավ Կանաց միջազգային համաժողովը, որի ժամանակ հեղափոխական Կլարա Ցետկինը առաջարկեց նշել Մարտի 8-ը որպես կանանց պրոլետարական դասակարգի ծննդյան օր:

Կանանց իրավունքների համար պայքարի օրը Եվրոպայում առաջին անգամ նշվել է 1911թ- Մարտի 19-ին: Ապա երեք տարի անց որոշում է կայացվել այն նշել Մարտի 8-ին: Մարտի 8-ը օրինական կարավիճակ ձեռք բերեց, երբ սեցիալ-դեմոկրատները կառավարություն ձեւավորելու հնարավորություն ստացան: Ռուսաստանում Մարտի 8-ը կարմիրով նշվեց օրացույցում հեղափոխությունից անմիջապես հետո:

1977թ. Միացյալ ազգերի կազմակերպությունը Մարտի 8-ը հայտարարեց Կանանց միջազգային օր`հանելով “պայքար” եւ “իրավունք” բառերը տոնակատարության բովանդակության սկզբնական ձեւակերպումից:

Շնորհավոր մարտի 8-ը /որ տարբերակով էլ այն ընդունեք/: Սիրեք, հարգեք ձեր կանանց նվազագույնը ապրիլի 7-ից մինչեւ մարտի 8, ոչ հակառակը

Գագիկ Բեգլարյանին այլընտրանք չկա՞

Մինչեւ այսօր առավոտ ի պաշտոնե Երեւանի քաղաքապետ Երվանդ Զախարյանը վերջին օրերին բացառապես ոչ մի հեռախոսազանգի չէր պատասխանում եւ հրաժարվում էր որեւէ մեկնաբանություն տալուց: Իսկ մայրաքաղաքում Կենտրոն համայնքի թաղապետ Գագիկ Բեգլարյանի եւ նրա թիկնապահների` դպրոցականներին ծեծելու մասին լուրերից հետո վերջինս անընդհատ հայտնվում էր լրատվամիջոցների ուշադրության կենտրոնում, իհարկե ոչ լավագույն դրսեւորմամբ: Այսօր արդեն Սերժ Սարգսյանի հրամանագրով Գագիկ Բեգլարյանը նշանակվեց Երեւանի քաղաքապետ, իսկ Երվանդ Զախարյանը` նախագահի խորհրդական:

Ակնհայտ է, որ Երեւանի ընտրված քաղաքապետը այլեւս երկրի առանցքային քաղաքական պատասխանատու պաշտոններից մեկն է լինելու եւ Հայաստանի 1/3-ով բնակեցված քաղաքի ղեկավարը ընտրազանգվածով ու պատասխանատվությամբ երկրի առաջին դեմքը կարող է դառնալ: Ակնհայտ է նաեւ, որ քաղաքական կուսակցությունները այս ընտրություններին մասնակցելու են ամենայն լրջությամբ, սեփական թեկնածուներով եւ ողջ զինանոցով, ինչպես արդեն հայտարարել են: Պարզ տրամաբանությամբ տարօրինակ է միայն` ինչու ՀՀԿ-ն որոշեց, որ իր “ամենաներկայանալի կուսակցական դեմքը” համարել երեւանցիների կողմից ոչ միանշանակ ընդունվող, մականունավոր, ադմինիստրատիվ հարցերում հաջողված, քաղաքական որոշումների հարցում դելետանտ/ՀՀԿ շարքերում ընդգրկվել է միայն 2 տարի առաջ, երբ Սերժ Սարգսյանը դարձավ ՀՀԿ նախագահ/ Գագիկ Բեգլարյանին ընտրել:

Դոլար-դրամ խուճապի “լողացող” միֆը

Այսօր ընդհամենը մեկ ժամվա ընթացքում դոլարի փոխարժեքը դրամի նկատմամբ 307 դրամից դարձավ 380 դրամ եւ ԿԲ-ն հապշտապ հայտարարեց փոխարժեքային լողացող քաղաքականության անցման մասին:
Ու մինչ տնտեսական վերլուծաբանները ու պատգամավորները ջանում էին դրական կամ բացասական անկյունից նայել երեւույթին, քաղաքացիները փողոցում իսկական խուճապի մեջ էին: Ասում են Երեւանի ծայրամասային թաղամասներում անգամ շարքերով խանութներ ու “դուքաններ” են փակել, շատերը պարզապես լավ չեն հասկացել`ինչ է կատարվում:

Համաշխարհային Բանկը իր տարածած հայտարարությունում իր աջակցությունն է հայտնել Հայաստանում լողացող փոխարժեքի քաղաքականության վերադարձին` նշելով, որ փոխարժեքի ճշգրտումը անհրաժեշտ է Հայաստանի մրցունակության բարձրացման եւ Հայաստանի վրա համաշխարհային տնտեսական դժվարություններից բխող արտաքին ցնցումների ազդեցության մեղմացման համար: Ըստ հայտարարության` Հայաստանը դիմակայում է համաշխարհային տնտեսական ճգնաժամը բավականին ուժեղ դիրքերից, ի շնորհիվ հավասարակշռված մակրոտնտեսական կառավարման, պետական պարտքի ցածր մակարդակի եւ գործուն բանկային համակարգի: “Համաշխարհային բանկի խումբը, 2009-2012 թվականների համագործակցության ռազմավարության շրջանակում, կշարունակի աջակցել Հայաստանին` Վերականգման եւ զարգացման միջազգային բանկի (ՎԶՄԲ) եւ Միջազգային զարգացման ընկերակցության (ՄԶԸ) 525 միլիոն ԱՄՆ դոլար ընդհանուր գումարով վարկային ծրագրերով”:

Արթո Թունջբոյաջյանը պատասխանեց

Քաղաքացի (01:42:31) Բարեւ մեր շատ սիրելի Արտո: Ուզում եմ իմանալ` երբ ես Հայաստան գալու ու երբեւէ կգաս այստեղ մշտական բնակության: Հիմա որտեղ ես: Ինչ նոր ծրագրեր ես իրականացնում:

Հիմա Ամերիկայում եմ, Լոս Անջելեսում: “HUMAN ELEMENT” անունով ծրագիրն ենք անում /keybortis,Scott Kinsey, Bassist Matthew Garrison, Drums..Gary Novak/: Էդոր գործերով զբաղված եմ, ձայանգրվում ենք, մարտի վերջին պիտի վարջանա ծրագիրը: ANB-ի եւ իմ սոլո համերգները շարունակվում են, Հայաստանում չեմ հիմա: Գիտեմ` երբ կուգամ Երեւան… Բայց էդտեղ ապրել դժվար կլինի, ադոր համար Զոլաքար տուն սարքում էի, հիմա կանգնեցինք… Երբ հարմար եւ ճիշտ ժամանակը պիտի շարունակեմ տունս սարքելը վերջացնել: Հուսով եմ իմ կյանքում ամեն ինչ նորմալ լինի ու այդ ժամ անշուշտ կապրեմ Հայաստանում:

Դավիթ Մուրադյան (17:19:00): Բարեւ սիրոլի Արթո ջան: Ես ուզում եմ իմանալ, թե ե՞րբ եք Հայաստանի ուկնկդիրներին ներկայացնելու Հրանտ Դինքի հիշատակին նվիրված ալբոմը; Ես գիտեմ, որ գրեթե պատրաստ է թողարկման նաեւ Հայկական նավատորմի նվագախմբի նոր ալբոմը; Իսկ այդ ալբո՞մը երբ եք ներկայացնելու, անհամբեր սպասում ենք, շատ անհամբեր:

Բարեւ Դավիթ ջան: CD-ի անունը “Ատելության դեմ ենք մենք” է: CD-ն երկուշաբթի դուրս եկավ Ստամբուլում, բայց 2 տարի պրոբլեմ ունեինք, մինակ Հրանտի երգի մասին չի խոսքը: “Ապուշ” անունով մի երգ ունեմ, էդի թուրքիայի կառավարությունը չթողեց, երգը դուրս հանինք, որովհետեւ ցեղասպանություան մասին բառեր կար: ANB-ի CD-ն 1-ին անգամ 2 ամսից դուրս կգա:

Ընդդիմությունը հանրահավաք արեց ու տուն գնաց

Ու չնայած մարզերից Երեւան բերող տրանսպորտային խոչընդոտներին, չնայած մայրաքաղաքում ոստիկանության կուտակումներին, ընդդիմության հանրահավաքը կայացավ ու այսօր Մատենադարանի հարակից տարածքում բամամարդ հանրահավաքի մասնակիցները հիշեցին “Մարտի 1″-ի բոլոր զոհերի անունները մեկ առ մեկ եւ մեկ րոպե լռությամբ հարգեցին նրանց հիշատակը:

Մասսայական հավաքների 4,5 ամսվա դադարից հետո հանրահավաքի մասնակիցների շարքերում հանդիպեցի նաեւ ընդդիմության քաղաքական հայացքներ չկիսողների, որոնք եկել էին պարզապես հետաքրքրությունից դրդված: Սովորականից մարդաշատ էր նաեւ հարթակը լրատվամիջոցների ներկայացուցիչներով, որոնք բազմաթիվ հարցեր էին պատրաստել ընդդիմության առաջնորդների համար:

Լեւոն Տեր-Պետրոսյանի ելույթը, որը ՀՀ-ում մարտի 1-ի հետեւանքների, իշխանությունների անօրինությունների, տնտեսական ճգնաժամը կոծկելու քաղաքականության բացահայտումից մինչեւ հանրահավաքի անցկացման խոչընդոտներին էր անդրադառնում:

“Դառնալով օրվա խորհրդին, ցավով պետք է արձանագրել, որ մարտի 1 ի ողբերգության տարելիցը մենք ստիպված ենք նշել ընկճող մթնոլորտում: Բանտերը շարունակում են լցված մնալ շինծու մեղադրանքների հիման վրա քրեական հետապնդման ենթարկված մեր տասնյակ ընկերներով: Ամբողջ մի տարի իշխանությունները ոչինչ չեն արել ոճրագործության բուն պատասխանատուների՝ մարդասպանների, հրձիգների, խանութներ թալանողների բացահայտման ուղղությամբ, ընդհակառակը, ջանք չեն խնայել նրանց հանցագործությունները կոծկելու համար: Քաղաքապետարանը 94 անգամ ապօրինաբար մերժել է հանրահավաքներ ու երթեր անցկացնելու մեր դիմումները: