Սերժ Սարգսյանի կադրային քաղաքականությունը

ՀՀ նախագահ Սերժ Սարգսյանը այսօր երկու կարեւոր նշանակումներ արեց. Կարեն Կարապետյան Հայաստանի Հանրապետության Նա­խա­գահի աշխատակազմի ղեկավար եւ Սլավա Սարգսյանին Հայաստանի Հանրապետության վճռա­բեկ դատարանի քաղաքացիական եւ վարչական պալատի նախա­գահ: Չնայած այսօրվա նյութերի լրահոսում ավելի կարեւոր եւ քննարկման արժանի թեմաներ կային, բայց այս փոքրիկ նյութով ուզում եմ պարզապես ձեր ուշադրությունը հրավիրել Սերժ Սարգսյանի կադրային, որոշ առումներով “հանրապետականազերծ” քաղաքականության վրա: Հետաքրքիր է, բայց փաստ, որ վերջին շրջանում նախագահը ակնհայտորեն պետական կառավարման համակարգը լրացնում է նոր` թարմ քաղաքական ուժերով` ՀՅԴ, ԲՀԿ, ՕԵԿ, այլոք: Քաղաքական նոր հենարան է փնտրում նախագահը, թե չի վստահում թիմակիցներին… Հետաքրքիր է իմանալ ձեր կարծիքը:

ԱԺ նոր նախագահը

ՀՀ Ազգային ժողովը այսօր ընտրեց իր նոր նախագահին: Ձայների գերակշիռ մեծամասնությամբ ԱԺ նախագահի աթոռը կզբաղեցնի Հովիկ Աբրահամյանը: Ընտրությանը մասնակցել է 115 պատգամավոր, որից 110 քվերակել է Հովիկ Աբրահամյանի, իսկ 5-ը Լարիսա Ալավերդյանի օգտին: Նշենք, որ ՀՀԿ խմբակցության նախագահ Կարեն Կարապետյանն առաջարկել է քննարկել ՀՀԿ կուսակցության անդամ Հովիկ Աբրահամյանի թեկնածությունը, “Ժառանգություն” խմբակցության ղեկավար Արմեն Մարտիրոսյանը` “Ժառանգություն” կուսակցության անդամ Լարիսա Ալավերդյանի: ԱԺ նախագահի պաշտոնը թափուր է սեպտեմբերի 26-ից:

Առաջարկում եմ ծանոթանալ նոր ԱԺ նոր նախագահի կենսագրությունը: Ծննդյան օրը, վայրը` 24 հունվարի 1958թ., Արտաշատի շրջան, գ. Մխչյան Կրթությունը` 1980-1984թթ. Երևանի ավտոճանապարհային տեխնիկում, 1985-1990թթ. Երևանի ժողտնտեսության ինստիտուտ Աշխատանքի փորձը` 1977-1979թթ. Ծառայություն Խորհրդային բանակում, 1990-1991թթ. Բուրաստանի կոնյակի գործարան` բաժնի պետ, 1991-1995թթ. Արտաշատի գինու -կոնյակի գործարան` տնօրեն, 1995-1999թթ. ՀՀ Ազգային Ժողովի առաջին գումարման պատգամավոր,

Կոպիտ ընտրախախտումներ ամենուր

Այսօր առավոտյան 8:00-ից Երեւանի Կենտրոն, Նոր-Նորք, Նորք-Մարաշ, Դավիթաշեն, Ավան եւ Շենգավիթ համայքներում մեկնարկել են տեղական ինքնակառավարման մարմինների ընտրությունները եւ “Ա1+”-ի թղթակիցները արդեն հասցրել են ականատես լինել բազաթիվ ընտրախախտումների: Մասնավորապես բաց քվերակության հանգամանքը բացահայտվել է տասնյակի հասնող ընտրատեղամասերում, վստահված անձանց ահաբեկում եւ ընտրատարածքից դուրս հրավիրելու միջադեպ, լրագրողի նկատմամբ սպառնալիքներ, ընտրակաշառքի բաժանում։Որպես քաղաքացի կարեւոր ներդրում կատարած կլինեք, եթե բլոգում պատմեք ձեր տեսածի եւ անմիջապես ձեր ընտրատարածքում ձեր քվերակության ժամանակ տիրող իրավիճակի մասին կամ այն ինչ երեւում է ձեր պատուհանից եւ պատմել են ձեզ ձեր բարեկամները։ Շտապ միջադեպի պարագայում էլ չմոռանաք գրել բլոգում եւ հնարավորության դեպքում անպայման կարձագանքենք դրանց։

Իսկ այժմ մի փոքր ընտրախախտումների “ոդիսականներից”։Գրողների միության շենքում տեղակայված թիվ 10/49 տեղամասում ժամը 9:30-ի սահմաններում տեղի է ունեցել բաց քվերակություն: Նույն տեղամասից դուրս են հանելԱրարատ Զուրաբյանի վստահված անձին: Թիվ 19 մանկապարտեզում գտնվող 10/07 տեղամասի ընտրական հանձնաժողովի նախագահ Արա Սադոյանը ոստիկանների օգնությամբ ընտրատեղամասից դուրս է հանել վստահված անձանց: Ժամը 10:45-ի սահմաններում միջադեպ է տեղի ունեցել Այգեստան թաղամասում գտնվող Ջ.Կիրակոսյանի անվան թիվ 20 դպրոցում տեղակայված N 10/03 ընտրական տեղամասում: Հանձնաժողովի նախագահ Սերգեյ Կոստանյանը ընտրողներից պահանաջել է կատարել բաց քվեարակություն, այսինքն` քվեաթերթիկը քվեատուփը գցել իրեն ցույց տալուց հետո:

Հանրահավաքը մեկնարկեց

Քիչ առաջ Հյուսիսային պողոտայում մեկնարկեց Հայ ազգային կոնգրեսի նախաձեռնած հանրահավաքը, որը վարող ՀՀՇ անդամ Արամ Մանուկյանը հավաքվածներին դիմեց “Հայաստանի ազատ քաղաքացիներ, Հյուսիսային պողոտայի տերեր, Հայ Ազգային կոնգրեսի անդամներ” բառերով: Ողջունելով բոլորին՝ նա ասաց, որ այս հանրահավաքը նվիրված է հաղթանակին ավելի մոտենալուն, եւ հանրահավաքի պատճառներից մեկը Կենտրոնի թաղապետի թեկնածու Արարատ Զուրաբյանի քարոզարշավին նպաստելն է: Նա շեշտեց, որ Կենտրոնի թաղապետի ընտրությունները ոչ թե նրա ընտրությունը եւ հաղթանակն է լինելու, այլ Հայ Ազգային կոնգրեսի:

Ապա ելույթ ունեցավ Սոցիալ-Դեմոկրատական Հնչակյան կուսակցության ատենապետ Լյուդմիլա Սարգսյանը: Նա նույնպես նշեց, որ սա ոչ թե թեկնածուի, այլ Կոնգրեսի հաղթանակն է լինելու եւ կասկած չունի, որ Հայ Ազգային կոնգրեսը հաղթելու է: “Եթե դուք մեր հավաքատեղիները սահմանափակում եք, մեզ թույլ չեք տալիս ուզած տեղերում հանրահավաք անել, դրանով մեծացնում եք հիասթափությունը ժողովրդի` ձեր նկատմամբ”,- դիմելով իշխանություններին՝ ասաց Լյուդմիլա Սարգսյանը:

Մարտի 1-ին զոհվել է 10 խոճկոր?

Մարտի 1-ի խորհրդարանական հանձնաժողովում այսօր մի շարք սենսացիոն բացահայտումներ արվեցին: Ընդդիմության տարածած տեսաերիզում անզեն աչքով տեսանելի է մարդկային մարմնի հատվածներ՝ ատամնաշարով ծնոտ, ուղեղի կտորներ եւ այլն: Այսօր դատաբժշկական փորձաքննությունների ազգային կենտրոնի ղեկավար Շոթա Վարդանյանը հայտարարեց, որ այդ կադրերում առկա ծնոտը ոչ թե մարդու, այլ երիտասարդ խոզի՝ խոճկորի ծնոտ է, հայտնաբերված լեզուն էլ մարդու լեզու չի, իսկ արյան տպավորություն ստեղծում են ստվերները: Նա նաեւ վստահեցրեց, որ կադրում անհայտ հեղուկ է, ոչ թե արյուն:

Ի դեպ, այդ եզրակացությունները նրանք արել են ոչ թե իրականում այդ օրը դատաբժշկական փորձաքննության արդյունքում, այ` միայն կադրերն ուսումնասիրելով: Շոթա Վարդանյանը նաեւ հայտարարեց, որ ոչ մի ոսկորի վրա կրակոցի հետք չկա, իսկ պարկուճները, որ կադրում թափված են արյունների մեջ, ըստ Վարդանյանի, բերվել դրվել են այդ վայրում: Շոթա Վարդանյանի հայտարարությունները հանձնաժողովն ընդունեց հալած յուղի պես, իսկ հանձնաժողովականները սկսեցին պահանջել, որ պատասխանատվության ենթարկվեն տեսաերիզի հեղինակներն ու տարածողները: ՕԵԿ անդամ Հովհաննես Մարգարյանն էլ ընդգծում էր այդ կադրերի թողած անդառնալի հետեւանքները հատկապես ՚մատաղ սերնդի վրաՙ, ովքեր տեսել են այդ երիզը:

Նկատենք, որ խնդրո առարկա կադրերը նկարահանել է “Ա1+”-ի օպերատորը եւ հանձնաժողովի անդամները ցանկության դեպքում կարող են անմիջապես նրանից ճշտել դեպքի վայրի “խոճկորներ” քանակը: Ի դեպ, այդ կադրերի բնօրինակի շարունակության մեջ քաղաքացիները ասում են. “Նկարի, նկարի, ջուրը լցրին, ջուրը լցրին, որ մաքրվի արյունները, նկարի, ես դրանց”: Եվ իսկապես կադրում ջրցան մեքենան դեպքի արյունոտ վայրը պարզապես ջրում է, լվանում հետքերը:

Մենք փորձեցինք հանձնաժողովականներից պարզել, թե քանի՞ անգամ են Երեւանի փողոցներում, հատկապես Մաշտոց, Գրիգոր Լուսավորիչ եւ Արշակունյաց փողոցներում խոճկոր տեսել: Պարզվեց, որ չեն տեսել, բայց ոչ մեկի մոտ հարց չառաջացավ, թե ինչ կապ ուներ դեպքի վայրում մոլորված խոճկորը, որի ծնոտը հետո ընդդիմությունը պետք է “շահարկեր”: Ասենք հարց տվող մեկ-երկու պատգամավորներն էլ այսօր չէին մասնակցում նիստին, մասնավորապես` ՄԱԿ նախագահ Գուրգեն Արսենյանը եւ ՀՅԴ անդամ Արծվիկ Մինասյանը:

Հայաստանը ՄԱԿ-ի Գլխավոր ասամբլեայի 63-րդ նստաշրջանում

Արդեն երեկվանից, ինչ նախագահ Սերժ Սարգսյանը մեկնեց Նյու յորք՝ ՄԱԿ-ի Գլխավոր ասամբլեայի 63-րդ նստաշրջանին մասնակցելու, ամենից շատ սպասում ենք նրա ելույթին, որ տեղի կունենա այսօր երեկոյան։ Անկասկած՝ տարածաշրջանային քաղաքական ու համաշխարհային դիվանագիտական գնահատականների առումով այն կարեւոր նշանակություն է ունենալու եւ նվազագույնը Հայաստանի արտաքին քաղաքականության արդյունավետության ցուցիչն է։ Դե ինչ, սպասենք մինչեւ երեկո ու ակնկալում եմ, որ ձեր տպավորություններով ու կարծիքներով չեք մոռանա կիսվել։

Իսկ մինչ այդ նախագահը տարբեր բարձրաստիճան հանդիպումներ է ունեցել: Օրվա երկրորդ կեսին իր կեցավայրում Սերժ Սարգսյանն ընդունել է ԱՄՆ Պետքարտուղար Քոնդոլիզա Ռայսին: Հանդիպման ընթացքում քննարկվել է հայ-ամերիկյան հարաբերություններին եւ տարածաշրջանային զարգացումներին առնչվող հար­ցերի լայն շրջանակ: Պետքարտուղարը շնորհավորել է Սերժ Սարգսյանին ` Թուրքիայի հետ հարաբերությունների կարգավորմանն ուղղված նրա նախաձեռնության համար եւ հույս հայտնել, որ Թուրքիայի Նախագահի այցը Հայաստան եւ հայ-թուրքական վերջին հանդիպումները համագործակցային ապագայի լավ սկիզբ են դնում: Մինչ Կոնդոլիզա Ռայսի հետ հանդիպումը Սերժ Սարգսյանը հանդիպում է ունեցել Նիդեռլանդների վարչապետ Յան Պիտեր Բալկենենդեի հետ: Անդրադառնալով Նիդեռլանդների խորհրդարանում Հայոց ցեղասպանության խնդրի քննարկումներին, Հոլանդիայի վարչապետը նշել է. “Մենք, իհարկե, շատ լավ տեղյակ ենք ցեղասպանության խնդրին, կարեւոր է անկեղծ եւ ազնիվ լինել պատմության հետ”: Սերժ Սարգսյանը հանդիպում է ունեցել նաեւ Սերբիայի նախագահ Բորիս Տադիչի հետ: Սերժ Սարգսյանը եւ Բորիս Տադիչը նկատել են, որ չնայած աշխարհագրական հեռավորությանը` հայ եւ սերբ ժողովուրդները պատմամշակութային շատ ընդհանրություններ եւ փոխադարձաբար ջերմ վերաբերմունք ունեն միմյանց նկատմամբ:

Կենտրոնում պայքարը թեժ է լինելու

Արդեն հայտնի է, որ սեպտեմբերի 28-ին Երեւանի Կենտրոն, Նոր Նորք, Նորք-Մարաշ,Ավան, Դավիթաշեն, Շենգավիթ համայնքների տեղական ինքնակառավարման մարմինների ընտրությունները դիտարկելու են 8 տեղական կազմակերպության եւ Եվրախորհրդի տեղական եւ տարածքային իշխանությունների կոնգրեսի դիտորդները: Հայտնի է նաեւ, որ ամենից լարված մթնոլորտը Կենտրոն համայնքում է, որտեղ “մենամարտի” են դուրս եկել գործող թաղապետ Գագիկ Բեգլարյանն ու ընդդիմադիր նախկին թաղապետ Արարատ Զուրաբյանը։ Այսօր արդեն սեպտեմբերի 26-ին Մատենադարանի հարակից տարածքում հանրահավաք անցկացնելու երկու կողմերի ներկայացուցիչների դիմումների մերժելու մասին էր խոսվում մամուլում։

Հիշեցնենք, որ սեպտեմբերի 16-ին Գագիկ Բեգլարյանի լիազոր ներկայացուցիչը Երեւանի քաղաքապետարան է ներկայացրել իրազեկում սեպտեմբերի 26-ին, ժամը 16-ին Մատենադարանի հարող տարածքում զանգվածային հրապարակային նախընտրական քարոզարշավ-միջոցառում անցկացնելու մասին: Երեւանի քաղաքապետարանը քննարկել է դիմումը եւ մերժել` առաջարկելով այն անցկացնել սեպտեմբերի 23-ին` այսօր, նույն ժամին, նույն տեղում: Սեպտեմբերի 26-ին զանգվածային հրապարակային նախընտրական քարոզարշավ-միջոցառում անցկացնելու մասին իրազեկում է ներկայացրել նաեւ Կենտրոն համայնքի ղեկավարի մյուս թեկնածու Արարատ Զուրաբյանը: Երեւանի քաղաքապետարանը մերժել է նաեւ վերջինիս դիմումը, ինչի փոխարեն առաջարկվել է հանրահավաքն անցկացնել սեպտեմբերի 26-ին “Դինամո” մարզահամալիրի հարակից տարածքում կամ սեպտեմբերի 22-ին Մատենադարանին հարակից տարածքում:

ԱԺ փոփոխությունների պատվիրատուին բացահայտում է մամուլը…

Հովիկ Աբրահամյանին՝ ԱԺ ղեկը ստանձնելու ծրագիրը դեռ ամիսներ առաջ էր շրջանառվում մամուլում ու հավանաբար դեռ ամիսներ էլ մամուլը կվերլուծի նախագահահաճո այս դերաբաշխման բոլոր հնարավոր տարբերակները։Ու հենց այդպիսի մամուլական հրապարակումներից էլ գուցե քննարկենք բլոգում։ Միայն այսօր ձեր ուշադրությունը ուզում եմ հրավիրել մի քանի հետաքրքիր հրապարակումների վրա, որոնց տրամաբանությունը բավականին մոտ է իրականությանը։

Ամեն ինչից երեւում էր, որ «Հովիկ Աբրահամյան-Աժ նախագահ» օպերացիան այսպես իրականացվեց՝ հենց Տիգրան Թորոսյանի վրա անհաղթահարելի ճնշում գործադրելու նպատակով, ինչը նրան կզրկեր մանեւրելու որեւէ հնարավորությունից։ Խնդրի լուծման իմպերատիվ բնույթը երկու հնարավոր արդյունք կարող էր ունենալ. կա՛մ Տիգրան Թորոսյանը, տուրք տալով այդ ճնշմանը, վայր է դնում զենքերը եւ ինքնակամ հեռանում, կամ հաշտվում է կուսակցության, ավելի ճիշտ՝ նրա նախագահի կայացրած որոշման հետ եւ, կորցնելով Հայաստանի Հանրապետության երկրորդ դեմքի իր կարգավիճակը, վերածվում է շարքային կուսակցականի։ ,-գրում է “Հետքը”՝ հանգամանորեն բացատրելով, թե ինչու՞ էր անհրաժեշտ Տիգրան Թորոսյանի հրաժարականը։ Բայց ամենաիրականը, ըստ երեւույթին, հոդվածագրի այն եզրակացություն էր ԱԺ գործառույթների ու քաղաքական հակակշիռ իստիտուտի բացակայության մասին։

Ուշագրավ է այն փաստը, որ ԱԺ նախագահի հրաժարականը ներքաղաքական որեւէ լարում այդպես էլ չառաջացրեց։ Դա հստակ ցույց տվեց, որ խորհրդարանը քաղաքական գործընթացների վրա որեւէ ազդեցություն չի գործում։ Այսինքն՝ մեկ անգամ եւս փաստվեց, որ կառավարման ընդհանուր համակարգում բացարձակապես չի աշխատում իշխանությունների տարանջատման, հակակշռման սկզբունքը, որովհետեւ հակակշռող ինստիտուտներից ամենակարեւորը, որը ձեւավորվում է ուղղակի ընտրությունների միջոցով, իր քաղաքական գործառույթը բացարձակապես չի կատարում։ Իսկ դա նշանակում է, որ խորհրդարանը բացարձակապես կորցրել է իր պաշտպանողունակությունը, դիմադրողականությունը։ Սակայն, դա ոչ թե համակարգային խնդիր է, այլ պարզապես մեզանում ձեւավորված քաղաքական մշակույթի, ավելի ճիշտ՝ դրա բացակայության արդյունք։

Շնորհավոր Տոնդ Անկախ Հայաստան

ՀԱՅԱՍՏԱՆԻ ԱՆԿԱԽՈՒԹՅԱՆ ՀՌՉԱԿԱԳԻՐ / Հայկական ԽՍՀ Գերագույն խորհուրդը՝ արտահայտելով Հայաստանի ժողովրդի միասնական կամքը, գիտակցելով իր պատասխանատվությունը հայ ժողովրդի ճակատագրի առջեւ համայն հայության իղձերի իրականացման եւ պատմական արդարության վերականգնման գործում, ելնելով մարդու իրավունքների համընդհանուր հռչակագրի սկզբունքներից եւ միջազգային իրավունքի հանրաճանաչ նորմերից, կենսագործելով ազգերի ազատ ինքնորոշման իրավունքը, հիմնվելով 1989 թվականի դեկտեմբերի 1-ի «Հայկական ԽՍՀ-ի եւ Լեռնային Ղարաբաղի վերամիավորման մասին» Հայկական ԽՍՀ Գերագույն խորհրդի եւ Լեռնային Ղարաբաղի Ազգային խորհրդի համատեղ որոշման վրա, զարգացնելով 1918 թվականի մայիսի 28-ին ստեղծված անկախ Հայաստանի Հանրապետության ժողովրդավարական ավանդույթները, խնդիր դնելով ժողովրդավարական, իրավական հասարակարգի ստեղծումը, ՀՌՉԱԿՈՒՄ Է անկախ պետականության հաստատման գործընթացի սկիզբը:Շարունակությունը՝ այստեղ։

Շնորհավոր Տոնդ ԱՆԿԱԽ ՀԱՅԱՍՏԱՆ ու շնորհավոր ձեր տոնը ԱՆԿԱԽ ՀԱՅԵՐ։ Ասում եմ այս խոսքերը ու սիրտս մի տեսակ գոռոզ հպարտությամբ է լցվում։ Մեր 17 ամյա անկախ պատանի Հայաստանի ծնունդն է։ Ուռա…

Վտանգավոր խաղեր տարածաշրջանում. Հայաստանը նոր խաղաքարտ?

Վտանգավոր խաղերը Կովկասում հրապուրում են այսուհետ ոչ միայն ռուսական կայսերական ձգտումներին եւ ԱՄՆ տարածաշրջանային գերակայության հաստատման քաղաքականությանը, այլեւ երրորդ պետություններին: Մասնավորապես մեր հարեւան Թուրքիայի վերջին շրջանի հարավկովկասյան
ակտիվությունը զգոնություն, ապա նաեւ հակամարտության կարգավորման եւ փակ սահմանների մասին բանակցությունների այլ որակ է խոստանում: Դեռ սեպտեմբերին, երբ Երեւանում Հայաստանի եւ Թուրքիայի ԱԳ նախարարը պայմանավորվեցին հանդիպել Նյու-Յորքում ՄԱԿ-ի գլխավոր ասամբլեայի շրջանակներում, այն էլ եռակողմ(Հայաստան-Ադրբեջան-Թուրքիա) ձեւաչափով:Ինչ հեռանկար կարող է ունենալ այս հանդիպումը Հայաստանի համար? Երկար քննելու հարցեր են:

“Հայաստանի եւ Թուրքիայի նախագահների հանձնարարությամբ, Թուրքիայի ԱԳ նախարար Բաբաջանի հետ անցկացված բանակցությունների արդյունքում մենք` երկու արտգործնախարարներս, հայտնեցինք երկկողմ հարաբերությունների լիակատար կարգավորման մեր վճռականության մասին եւ փորձում ենք քայլեր ձեռնարկել այդ ուղղությամբ: Հուսով եմ, որ մենք կգնանք այդ ճանապարհով առանց միմյանց առջեւ արհեստական խոչընդոտներ ստեղծելու”,- ասել է ՀՀ արտգործնախարարը:

Նախօրեին ամերիկահայ քաղաքական վերլուծաբան Ռիչարդ Կիրակոսյանը “Ա1+”-ին ասել էր, որ Ղարաբաղյան բանակցություններում Թուրքիայի միջնորդական առաքելությունը անհնար է համարում,”որովհետեւ ռուսները եւ ամերիկացիները միասին են ջանքեր գործադրում Մինսկի խմբում, եւ երկուսն էլ ուզում են ստատուս քվոն պահպանել. այդ իմաստով Թուրքիայի մուտքը բանակցային գործընթաց անկարելի է”: Նա նաեւ ասել էր, որ չի վստահում այն խոստումներին, թե հայ-թուրքական մերձեցման դեպքում ղարաբաղյան հարցը ավելի հեշտ կլուծվի:

“Սուտ է: Այդ խոսքը ավելի շահ ունի Բաքվի համար”,- նկատում է Կիրակոսյանը: Իսկ Թուրքիայի ակտիվացումը տարածաշրջանում Ռիչարդ Կիրակոսյանի կարծիքով` անջատողական բնույթ ունի. այսինքն, “Թուրքիան, եւ ոչ թե Թուրքիան Ամերիկայի հետ, սեփական ձեռագիրն ունի իր շահը գործադրելու, հավաքելու եւ պահելու իմաստով”:

ՀՀԿ-ն իշխանության գալու կուսակցություն?

Քաղաքական հեղինակությունների իստիտուտում Հանրապետական կուսակցությունն անկասկած իր “ներդրումն” ունի/չենք քննում դրական կամ բացասական կողմը/, իսկ ԱԺ-ի վերջին դերափոխություններն ու աղմուկն այդ մասին, ակամա հայացքդ գցում է կուսակցության “կազմի” եւ գաղափարակիցների վրա: Կուսակցությունը նպատակահարմար է գտել ԱԺ նախագահի պաշտոնում առաջադրել Հովիկ Աբրահամյանին` չնայած նրա հեղինակությանը փոքր ինչ վերապահումներով են մոտենում հասարակությունում/առայժմ/: Հետաքրքիր է իմանալ` ով է ըստ ձեզ հեղինակություն Հանրապետական կուսակցությունում եւ ով է հեղինակություն առհասարակ մեր օրերում:

Այս փոփոխությունը, ճիշտ է, անմիջականորեն Տիգրան Թորոսյանի դեմ էր, բայց սա անհամեմատ ավելի ահավոր քայլ էր հենց ՀՀԿ-ի համար, քանի որ գլուխ բարձրացրին այդ կուսակցություն ներթափանցած քաղաքական խոպանչիները: Անդրանիկ Մարգարյանից հետո իսկական հանրապետականների թեւերը կամաց-կամաց կտրելով կամ խուզելով՝ ՀՀԿ-ն դարձրին պարզապես նոմենկլատուրայի, իշխանության կուսակցություն, կոմկուսի վերաշինված մի տեսակ:

Պատմությունը գրեց Սամվել Բաբայանը…

Անկասկած այսօրվա հագեցած քաղաքական իրադարձությունների համատեքստում բազմաթիվ թեմաներ կար գրելու եւ քննարկելու: ՀՀԿ-ի խորհրդի նիստն ու Շարմազանովի պատասխանը Տիգրան Թորոսյանի երեկվա հայտարարություններին երեւի այսօրվա “բումն” էին: Բայց այսօր “հայոց պատմություն” է կերտվել ու հանրությանը ներկայացվել: Ու երեւի սա ոչ պակաս կարեւոր թեմա է: Այսպես ԼՂՀ պաշտպանության նախկին հրամանատար Սամվել Բաբայանը իր հուշերի հիման վրա գիրք է գրել “Հաղթանակներն ինչպես եղել են.Ազդականչ-44″, գլխագրում էլ, թե “Բազում արքաներ, իշխաններ, զորավարներ եւ այլ նշանավոր պատմական այրեր պահել են տարեգիրների, վարձել պատմիչներ, հօգուտ իրենց կեղծել իրականությունը”: Թերեւս հեղինակը ճիշտ է: Չեմ համարձակվում կասկածի տակ առնել գրքի հեղինակի օբյեկտիվությունը կամ անկեղծ մտադրությունը, բայց համաձայնեք` պատմություն կոչեցյալը իրոք սուբյեկտիվ էշություն է ու փաստ է, որ հիմա էլ կերտման պրոցեսում է, մենք այսօր մեղմ ասած ոչ միանշանակ ենք վերաբերվում մեր երեխաների ապագա Վարդան Մամիկոնյաններին…

Ե.Գ. Դնում եմ Վիկիպեդիայում Սամվել Բաբայանի անավարտ հոդվածի լինքը: Կերտեք ժողովուրդ, սեղմեք այստեղ

Ումից է նեղացել Տիգրան Թորոսյանը?

Քիչ առաջ ԱԺ արդեն նախկին նախագահ Տիգրան Թորոսյանը ասուլիսում հայտարարեց իր հրաժարականի մասին, հայտնեց նաեւ, որ հեռանում է Հանրապետական/ՀՀԿ/ խմբակցությունից: Նա իր հրաժարականը բացատրել է «ներքին քաղաքական հարցերում մեծամասնության հետ զգալի տարակարծություններ ունենալու պատճառով: Համամասնական ընտրակարգով ԱԺ անցած Թորոսյանը նաեւ ասել է, որ պատրաստվում է շարունակել իր աշխատանքը խորհրդարանում պատգամավորի կարգավիճակով:

Հիշենք, որ արդեն օրեր առաջ ՀՀԿ գործադիր նիստի որոշում էր կայացրել, որ այլեւս աննպատակահարմար է Տիգրան Թորոսյանի ԱԺ նախագահի պաշտոնում աշխատանքը եւ այդ պաշտոնում առաջադրել դեռ օգոստոսին մեծամասնական կարգով պատգամավոր ընտրված Հովիկ Աբրահամյանի թեկնածությունը: Ըստ ամենայնի ՀՀԿ-ն հենց այսօր կգումարի խորհրդի նիստ, որտեղ եւ կհաստատի Տ. Թորոսյանին Հ. Աբրահամյանով փոխարինելու վերաբերյալ որոշումը: Մի հիշեցում էլ անենք այն մասով, որ Հովիկ Աբրահամյանն էլ խորհրդարան էր մտել 17 ընտրատարածքից պատգամավոր ընտրված իր պատգամավոր եղբայր Հենրիկ Աբրահամյանի հրաժարականի արդյունքում:

Համաժողովրդական շարժումը հանրահավաք է անում/լրացված/

Վաղը տեղի կունենա համաժողովրդական շարժման հարհավաքը եւ երեկ արդեն հանրահավաքի իրազեկման ժամանակ միջադեպեր եղան: Ըստ ամենայնի` կարեւոր քաղաքական հայտարարությունների եւ զարգացումների առումով հետաքրքիր նորությունների սպասել կարելի է: Բայց առավել հետաքրքիր է կարդալ ձեր կարծիքն ու սպասելիքները այս հանրահավաքից: Ի դեպ, մի մոռացեք օգտվել այս բաժնում ինֆորմացիայի փոխանակման ձեր իրավունքից եւ մեզ ու բոլորին տեղյակ պահեք այս իրադարձության շուրջ վերջին զարգացումներից:

Փոփոխությունները ԱԺ-ում ու լուրերը ԱԺ-ից դուրս

Դիտանց անելով վերջին օրերի մամուլի հրապարակումներին ուզում եմ ձեր ուշադրությունը հրավիրել երկու “ծամծմված”, բայց դեռեւս կարեւոր թեմաների վրա` Հայաստան-Թուրքիա “զարգացող հարաբերությունների” մասին թուրքաադրբեջանական արձագանքներն ու հայաստանյան մեկնաբանությունները:

Ադրբեջանական լրատվամիջոցները տարածել են տեղեկատվություն, համաձայն որի` Թուրքիայի նախագահ Աբդուլահ Գյուլը ՚Սաբահՙ թուրքական պարբերականին հայտնել է բառացիորեն հետեւյալը. ՚Հայաստանը խոստացել է ազատել Ադրբեջանի գրավյալ տարածքներըՙ: Այս տեղեկատվությունը խորհրդարանական ուժերը մեկնաբանեցին տարբեր կերպ. ՕԵԿ-խմբակցության պատգամավոր Հովհաննես Մարգարյանը աներկբա հայտարարեց, թե ադրբեջանական մամուլը ինչպես միշտ ստում է: Ընդդիմադիր ՚Ժառանգությունՙ խմբակցության պատգամավոր Վարդան Խաչատրյանը այս առիթով ասաց. ՚Հայ հասարակությունը բանակցությունների մասին տեղեկացված չի եղել եւ այն ինչ իմացել ենք, իմացել ենք ինքնաթիռի մեջ Գյուլի Թուրքիայից ժամանած լրագրողներին տված հարցազրույցներից. հետո արդեն տարածվել է տեղեկատվություն, որ եղել են բանակցություններ, որոնք հայկական հասարակության համար մնացել են փակ:

Ապա ՀՀԿ երկար սպասված “ռակիրովկա”-ն Թորոսյան-Աբրահամյան:

Մարզիչը որոշել է, եւ թիմը չի կարող առարկել, թիմը կարգապահ է եւ չի կարող դաշտից հեռանալ: Յուրաքանչյուրը վազում է եւ կատարում է իր հանձնարարությունը, եւ խաղային օղակների գործունեության մեջ խաթարում չի կարող տեղի ունենալ, եթե թիմի ավագը փոխվում է մարզիչի որոշմամբ: